MELBOURNE, Australia- E historia di e pastoor Gerald Francis Ridsdale ainda tin Australia hororisa y mundo henter. Recientemente ela wordo declara e pedofiel mas prolifico, ya cu su victimanan di abuso sexual lo por pasa mil mucha.
Naci na 1934, el a cuminsa studia den e seminario cu su 20 aña di edad. Na 1961 el a wordo ordena como sacerdote. Sin embargo, tabata te den decadanan di 1980 cu a cuminsa surgi denuncianan den su contra, cu a caba den un prome huicio den su contra na 1994, unda el a wordo haya culpabel y a wordo sentencia na 18 aña di prizon. Despues na 2006, ela wordo sentencia na 13 aña di prizon y na 2014, cu ocho aña mas.
Aunke ainda su delitonan ta bou di investigacion, ta conoci cu durante decadanan el a abusa di centeras di menornan di edad. El a admiti su culpabilidad den tur e delitonan di cual e ta wordo acusa.
Fiscal Jeremy McWilliams, encarga cu varios di e casonan contra di Ridsdale, ela comenta na prensa algun di e hechonan cometi door di e pastoor. Entrenan e abuso di un mucha homber y un mucha muhe, despues di e entiero di nan tata, presidi pa e mesun pastoor Ridsdale.
Tambe e ta wordo acusa di a spierta e yiu muhe di un famia di cual e tabata brinda apoyo spiritual, y cu complicidad di e tata, a hib’e ta na e misa, unda cu el a abusa di e mucha. “El a hib’e te na e altar, y a pon’e drumi eyriba. El a susura den su orea cu Hesus a muri pa nos picanan, e ora nos por wordo pordona y si mi confesa e pica aki, mi por wordo pordona”, McWilliams a conta.
Entre e frasesnan bisa na su victimanan ta mustra diferente menasanan. El a bisa un mucha, cu e abuso tabata “parti di e trabao di Dios”, pero si e conta un hende di esaki Dios lo castiga su famia.
“Ta nos secreto, no bisa bo mama nada, of bo tata lo por muri”, el a menasa un otro mucha.
Fuente: https://actualidad.rt.com/