Un pastoor y su señora cu a caba di yega Maracaibo y un chauffeur, a fayece dialuna atardi, banda di 5’or ora cu e auto cu nan tabata aden, a dal contra di un truck.
Segun autoridadnan di trafico, e accidente a tuma luga di forma frontal den e sector Macucutao di e municipio Guajira y e pareha misionero a wordo identifica como Angel Maria Fernandez Ruda di 55 aña y Ilse Beatriz Cegrera Cruz di 54 aña, mientras cu e chauffeur di e auto modelo caprice, ta conoci como Otto.
E pareha tabata di nacionalidad Colombiano, y tabata biba na Aruba. Ayera nan a sali for di eynan pa Maiquetia, despues di a tuma un vuelo pa e aeropuerto di Chinita. Su destino final tabata Santa Marta, Colombia unda cu nan lo a asisti na un entierro. Personanan cercano na e pareha a comenta, cu una bes cu nan a yega na e aeropuerto La Chinita, nan a coy un taxi pa bay na e Plaza de Toros, y despues a subi den e auto caprice, cu lo a hiba nan pa Maicao. Un ora despues, e accidente a tuma luga. Eynan tambe un dama cu tabata pasahero den e auto, a keda herida. Pero ta desconoce su estado di salud.
E curpanan di Angel y Ilse a wordo hiba na e morgue forense di Maracaibo, unda cu lo efectua un autopsia.
Angel Maria Fernadez Ruda ta pastoor di Iglesia Sion Aruba. Nan ta laga atras tres yiu, un mucha muhe cu por cierto ta recien gradua y dos yiu homber.