MARACAIBO, Venezuela- E Arkidiocesis di Maracaibo, encarga cu Monseigneur Angel Caraballo, a pidi famia di e victima pordon y a anuncia e ex comunion inmediato di Merino Padial.
Ivan Merino Pedial, un pastoor di origen Spaño, a wordo deteni den e estado occidental di Zulia, Venezeual, despues di a wordo acusa di a abusa sexualmente di un hobencita di 12 aña, según ministero publico a informa.
Pastoor di e iglesia Maria Inmaculada, Pedial a wordo deteni diasabra ultimo pa autoridadnan policial ora cu e tabata cu e menor den un auto Volkswagen, den e urbanisacion La Trinidad na Maracaibo, capital di e estado Zulia. Despues di a wordo deteni, Ministerio Publico a acusa e pastoor di abuso sexual y el a wordo cera den un centro di coordinacion policial di e estado.
Arkidiocesis di Maracaibo, na cargo di Monseigneur Angel Caraballo, a pidi e famia di e victiman pordon y a anuncia su ex comunion (di Merino Padial) cu lo no eherce “niun tipo di cargo”, den Iglesia Catolico, segun e corant Panorama.
SOSPECHO DI BISIÑANAN
Segun medionan local, bisiñanan a cuminsa sospecha di e pastoor ya cu despues di haci misa diadomingo, e tabata bay na e cas di e victima, pa despues nan bay keiro y e pastoor tabata trece e hobencita cas bek pa mei anochi.
Bisiñanan a cuminsa ripara tambe cu e hobencita a cuminsa bisti sapato hilchi halto, blusa y carson preta.
Riba rednan social a filtra un video unda cu e ex pastoor ta bisa cu “el gara cariño” pa e mucha y cu despues “un cos a conduci na e otro”.
Ministerio Publico a informa cu e mucha a confesa cu e tabata wordo abusa pa e ex pastoor pa tres aña caba,
Di otro banda, e secretario di gobernacion di Zulia, Lisandro Cabello, a indica cu e pastoor ta wordo investiga pa autoridadnan pa su supuesto vinculo di abuso sexual di otro menornan di edad den e mesun region, segun Versión Final.