CIENCIA/SALUD
LONDRES, Reino Uni- Un pashent cu HIV a bira e di dos adulto na mundo pa cura di e virus di AIDS, segun Reuters a reporta, citando dokternan cu a trata e pashent aki.
Segun informenan, e homber, di edad y nacionalidad desconoci, lo a infecta cu e virus di HIV na 2003. Casi tres aña despues di a ricibi un transplante di beenmerg (bone marrow) di un donante cu’n mutuacion genetico raro y resistente na e infeccion di HIV (yama CCR5 delta 32) y mas di 18 luna despues di a stop di bebe remedi antiretroviral, e pruebanan altamente sensibel ainda no ta mustra niun rastro di su infeccion di HIV.
“Funcionalmente cura”
Segun e profesor Ravindra Gupta, “no tin virus cu nos no por midi.. Nos no por detecta nada”, el a agrega. Na mes momento, el a precisa cu ta trata di un pashent “funcionalmente cura” y “den remision”. “Ta demasiado pronto pa bisa cu e ta cura”, el a adverti.
E prome caso di e cura funcional di HIV tabata di e Mericano Timothy Brown, conoci como e pashent di Berlin. Brown a wordo someti na un tratamento similar na Alemania 2007. SEgun expertonan, ainda e ta liber di HIV.
Dokternan cu ta trata e pashent di London ta señala cu e caso aki ta demostra cu algun dia cientificonan lo por caba cu AIDS, aunke esaki no ta nifica cu nan a haya un cura pa HIV.
Di otro banda, expertonan cita door di Reuters ta señala cu ta impensabel cu tratamentonan di e tipo aki por ta un manera di cura tur pashent, debi cu e ta caro, complico y tin su risiconan. Ademas, ainda no ta conoci di e mutacion genetico CCR5 delta32 ta e unico clave pa e tratamento aki.
Dokter Timothy Henrich, profesor asocia di medicina y cientifico medico di e Universidad di California, di e Departamento di Medicina di San Francisco, a señala tambe cu e tratamento di e pashent di London “no ta un strategia seguro of economicamente viabel pa induci remision di HIV”. P’awo, su uzo ta restringi na esunnan cu mester di e transplante pa otro motibonan, no solamente pa HIV, Henrich, cu no a participa den e estudio nobo di e caso, a bisa.
“Tin hopi strategia na e momentonan aki cu ta wordo sigui”, Henrich a bisa”. Algun di nan ta directamente relaciona cu e pashent di Berlin y ta funciona cu transplantenan: por ehempel, terapia di modificacion genetico.
Cientificonan ta studiante tambe terapianan cu ta mofidica e sistema inmunologico.
“MI ta un optimista door cu mi ta un cientifico y viceversa”, Henrich a bisa. “MI tin speransa. Mi ta haya un cura cu por wordo amplia y por wordo aplica na e gran mayoria di e personanan cu ta biba cu HIV ta definitivamente alcansabel/ Pero ainda nos tin hopi trabao pa haci”.