RIO DE JANEIRO, Brasil – E accidente a laga por lo menos 15 persona herida, dos di nan ta den estado grave. Ya diadomingo a presenta otro accidente di un carosa cu a perde control y a dal varios persona.
E caida di un pasarela di un carosa durante un di e desfilenan di e Sambodromo di Rio de Janeiro, a causa por lo menos 15 herido di diverso consideracion, segun fuentenan oficial.
E accidente a tuma luga ora cu un pasarela instala riba un carosa gigantesco di e scol Unidos da Tijuca, cu un dozijn di persona cu tabata baila riba dje, a cay den otro, pa motibonan cu ainda ta desconoci.
Polis y e servicionan di atencion sanitari a cuminsa di inmediato e evacuacion di heridonan, cu segun e Ayuntamiento di Rio ta por lo menos 15, di cual cinco di nan a wordo traslada pa hospitalnan proximo y dos di nan ta den estado grave.
E desfile di Unidos da Tujica a cuminsa cu normalidad, pero ora cu su di dos carosa, inspira riba New Orleans, a cuminsa cu su avanse riba e pista di Sambodromo, e pasarela, instala varios meter riba e di tres piso, a cay den otro.
E accidente a provoca momentonan di tension entre e responsabelnan di e organisacion y e directivonan di e scol, cu a deriva den pushamento di e periodistanan pa evita pa nan acerca na e carosa.
Tras e confusion inicial, e direcicon di e scol a dicidi continua cu e desfile a ordena na nan diferente hala (sector) pa nan avansa riba e pista di Sapucai, apesar cu polis y efectivonan sanitario tabata sigui atende e heridonan den riba e carosa.
E scol a obedece ordennan y nan 3600 miembronan a sigui cu e show, aunke hopi di nan a sigui na yoramento.
“Tijuca tin un obligacion cu e publico y cu e transmision, kende tin cu wordo atendi ta wordo atendi y e resto ta purba di sigui normalmente,” e director di e montahe, Fernando Costa, a bisa na un emisora local algun minuut despues.
E di dos, y e ultimo anochi di carnaval den e Sambodromo a cuminsa cu un otro incidnete, cu afortunadamente a caba sin herido, ora cu otro carosa, di e scol Uniao a Ilha, a dal contra un stacion di television na final di e circuito, supuestamente door di problemanan tecnico.
Den e anochi di diadomingo, durante e prome hornada di e desfilenan den e Sambodromo, un carosa a perde control durante un maniobra y a provoca 20 herido, di cual ocho a ricibi atencion hospitalario y un a sigui den estado critico.
Fuente: El Espectador