Diasabra mainta den e ballroom di Aruba Marriott Resort a tuma luga un seminario di deporte cu Minister di Salud Publico, Cuido di Nos Grandinan y Deporte, dr. Carlos Alex Schwengle a organisa pa partner y federacionnan por a haya mas informacion riba e maneho di deporte cu lo bay tin pe proximo añanan. Tambe a tuma luga e firmamento di e acuerdo esta un letter of intent, cu e partnernan IBiSA, ASU, COA, FFD y FLPD.
Diasabra mainta tabatin diferente presentacion durante di e seminario di deporte, unda cu Ministerio di Deporte a invita e partnernan IBiSA, ASU, COA, FFD y FLPD. Aki nan a papia cu e partnernan di deporte pero tambe cu e federacionnan. No ta tur federacion a presenta y esaki Minister Schwengle a haya un lastima pasobra tabatin e oportunidad pa tur por a discuti riba deporte en general y e contenido di e vision di deporte pa e proximo añanan.
Ministerio di Deporte no ta e unico cu a skirbi e vision, pero esaki a bay cu colaboracion di e partnernan. E presentacion tabata riba e contenido y alabes tabatin presentacion di e team cu profesor Kunneman y a trata e codigonan pa bon gobernacion den deporte. Ainda esaki no tin di haber cu consecuencia pe federacionnan, pero si e lo bay tin consecuencia pe partnernan di deporte. “E documento no ta ful cla, pasobra ainda nos tin un par di discusion riba dje y mi ta kere pa 1 of 2 luna nos por firma riba e documento aki tambe”, Minister Schwengle a remarca. Esey lo ta un afspraak di kico ta un bon gobernacion den deporte pe binidero 2 pa 4 aña y pasa cada tanto aña nos kier revisa e codigonan y ta palabracionnan cu ta traha conhuntamente cu e federacionnan den deporte. Tambe e partnernan lo tene otro responsabel pe afspraaknan aki.
E otro presentacion tabata di studiantenan di IPA cu actualmente ta haciendo nan estudio di movecion y salud cu ta un HBO opleiding. Ministerio di Deporte a pidi nan pa haci un presentacion di nan estudio, kico nan ta haciendo, kico esey ta significa pe mundo deportivo na Aruba y pa salud en general. Tambe pa nan presenta con nan ta mira deporte como meta pa por promove bida saludabel y miho bida pa cada cuidadano.
“Esey ta nos vision y tambe ta importante cu tin un sportonderzoek cu ta midiendo deporte na Aruba”, Minister Schwengle a expresa. No ta haci esaki solamente pa muchanan, pero pa adulto tambe. Profesor Bob Heron conhuntamente cu Universidad di Aruba a haci e investigacion, pero investigacion no ta cla y a duna algun cifra preeliminario pa duna un bista con hopi participacion tin den deporte. E no ta fatal pero e por ta hopi mas miho.
“Na final di dia nos a yega na un acuerdo, cu e partnernan, y unda nos a firma un intentieverklaring cu e puntonan cu ta nombra den e documento”, Minister Schwengle a remarca. E puntonan aki lo ta un sorto di guia pa e 2 pa 4 aña binidero . E maneho specifico lo ta basa mas tanto riba afspraaknan y esey tabata e intentieverklaring.
Pa loke ta riba e feedback di e fundacion y federacionnan, Minister Schwengle ta kere cu cierto temanan mester bay tuma mas splicacion manera e codigonan di bon gobernacion. Tur documento y tur presentacion presenta na e seminario lo wordo poni hunto cu e documento di vision di deporte y tur partner y federacion lo hay’e esaki. Tambe Minister Schwengle a agrega cu lo haci entrega di esaki na Parlamento y Conseho di Minister.