Partidonan nobo di hoben no ta wordo tuma na serio?

Ken por a imagina cu ya caba nos lo a cuminsa drenta den e ambiente di campaña politico un aña prome cu nos siguiente eleccion, den un forma tan colorido manera esaki. Y nos no ta papiando di sticker of bandera geel y berde circulando tur caminda, ta partidonan nobo ta esunnan cu a tuma e iniciativa pa kick-start campaña electoral prome, den un forma bastante interesante uzando rednan social.

Den pleno pandemia, Aruba a conoce un partido nobo cu a anuncia nan mes oficialmente riba 28 di juli 2020 bao nomber di HTC – Hubentud Treciendo Cambio. Manera conoci, esaki ta un partido nobo cu ta considera nan mes ‘fresco y hoben, haciendo esaki completamente boluntario y di curason.’ Riba rednan social por tuma nota tog cu tin algun hende ta comenta cu mester duna e hobennan aki un chens, nan merece un oportunidad, claro.

Partido HTC registra oficialmente na Conseho Electoral di Aruba

Sinembargo, locual ta remarkabel ta cu cada biaha e hobennan aki bini dilanti sea cu un video nobo of rueda di prensa, por tuma nota cu un gran mayoria di hende no ta tumando e partido aki mucho na serio. Mala fama tambe ta fama? Esaki ta conta tambe den e caso aki manera algo positivo cu ta traha na nan beneficio? Ken sa. Manera nan strategia recien di publica videonan corto riba nan pagina di Facebook, un strategia cu hopi a considera bastante agresivo a base di nan manera di papia. Varios hende ta haciendo joke di esakinan.

El a cuminsa na nan prome rueda di prensa oficial, te awo na videonan Live of entrevistanan cu nan ta haci, ta parce cu no ta muchu hende ta tumando e hobennan aki na serio.

Dicon nos ta bisa esaki? Wel, na prome luga, e cantidad di ‘memes’ y videonan satirico cu ta circula rond di medionan social ta mustra di ta hayando hopi mas atencion cu e seriedad cu e hobennan aki kier refleha den nan decision pa drenta den e arena politico. E hobennan aki ta bisa cu esaki tabata un decision dificil pa nan como hoben pa tuma e paso aki, pa “tuma e rumbo corecto pa Aruba y naturalmente ricibi e confiansa di pueblo.’

Y ta con un partido politico nobo ta gana confiansa di un pueblo? HTC por ehempel a cuminsa ta bisa cu nan no ta para pa e manera tradicional di politica, pero ya caba a laga traha T-Shirt, y print nan famoso frase ‘bril ciego bo tin’ riba un pechi. Contradictorio? Kisas.

Pero nos tin cu para keto un rato y ripara cu berdaderamente nos pueblo ta birando hopi mas consciente di politica y asuntonan gubernamental riba nos isla, of wel, den otro palabra, hopi di nos hendenan ta cansa di e mesun promesanan y sistema politico cu nos a biba pa hopi aña.

Nos a scucha y mira casi tur cos caba. Pero, nos ta hopi mas habri pa mira kende lo bin cu e curashi, conocemento, sabiduria, esfuerso y tur otro combinacion di rekesitonan cu lo convence nos cu nan lo merece nos voto pa di berdad hiba nos pais dilanti. E speransa t’ey, apesar cu awor ta mustra cu politiconan y mandatarionan lo mester traha un tiki extra duro riba esey mirando e reputacion cu nan tin awor riba nos isla. E confiansa no ta mucho waw.

“Nos ta scucha pueblo! Pueblo kier cambio!”
Ora cu nos manera pueblo ta mira personanan cu ta Sali afo cu curashi pa representa nos, e ta semper asina cu nos kier mira tambe si den realidad e personanan aki ta apto; kico bo a logra caba cu bo por demostra bo produci resultadonan productivo? Kico ta bo ideanan, bo fuentenan of recursonan, den kico bo tin experiencia y/of lo kier aporta y con bo lo kier haci esaki? Ta varios pregunta ta lanta na mesun tempo ora bo mira e tipo di cosnan cu nos ta mirando ultimamente ta naciendo den nos politica Arubano, y no ta necesariamente pasobra cu e partidonan nobo aki ta consisti di hoben kiermen cu nos no mester tuma nan na serio tampoco.

Semper ta bon pa scucha, analisa, y purba na compronde pa otro, claro.

Pero na otro banda, mescos cualkier funcion cu bo kier eherce, abo mester tambe percura cu bo ta bon prepara p’e cu e conocementonan necesario, no solamente pa bo berdaderamente por wordo tuma na serio den loke bo ta haci, pero pa sigura cu di berdad bo ta bay haci algo y cu bo tin e capacidad di haci e. Na final di dia, ni mas cu bo grita den bo videonan, ripiti palabranan bunita den ruedanan di prensa manera tur otro politico semper a sa di haci, print t-shirt pa bo siguidornan, promete shelo y tera, ta bo actonan ta locual lo resalta, no loke bo ta papia.

E hobennan cu ta drentando e arena politico awor na Aruba por wel di tin bon intencion – nos ta spera – y p’esey ta semper bon pa keda positivo y desea nan tur cos bon riba nan caminda.

Mundo di politica ta cruel, y realidad di bida ta cu bo mester ta bon sigur di bo mes y bon prepara pa enfrenta tur reto cu bo ta bay confronta ora bo dicidi di cana e caminda aki, manera nan sa bisa ‘wak pa bo tin un lomba hancho.’ Nos ta desea tur hoben y partido nobo exito y hopi suerte, algo cu kisas algun di nan lo mester hopi di dje!

 

 

 

Comments

comments