Sra. Julie de Cuba, candidata ariba lista di partido ReD, ta di opinion cu ta tempo pa cuminsa reforesta Aruba den forma integral. Pa medio di departamento di LVV Santa Rosa por cuminsa na prepara areanan cu ta desierto y despues zaai semiyanan usando drones. Lo ta ideal pa Stimaruba yuda coordina esaki ya cu nan tin e conocemento di matanan endemico of apto pa cierto areanan. Nos mester ta mucho mas creativo y inventivo con pa acumula y retenene mas awasero posibel den damnan, tankinan, reservoirs, regenbak etc. etc. Y mester cuminsa haci mas uso di awa di facilidadnan di RWZI y spoelwater di WEB.
ReD den su programa ta pone enfoke riba esaki pa promove agricultura pa pueblo por haya fruta y berdura cumpra localmente y na prijs economico. E parti di reforestacion ta hopi esencial pa contra-aresta erosion di nos suelo. Un aspecto agradabel ta cu pa medio di reforestacion integral ta hisa calidad di nos naturalesa y ta crea sombra bao mata cu ta permiti pa hende por sali mas for di e solo cayente, haci picnic y respira aire fresco y saludabel. Esaki na su turno ta promove salud di hende.
Bienestar di pueblo ta para halto riba agenda di Partido ReD. Pesey lo mi sigui elabora riba e proyectonan cu nos como partido ta desea di implementa pa bienestar di tur habitante di nos pida baranca.