Durante un rueda di prensa di RED Democratico dialuna mainta, Minister di Enseñansa Rudy Lampe a informa cu partido RED a caba di tene su reunion anual di miembresia. For di 2003, ora cu RED a lanta, te cu 2020, pa 17 aña consecutivo, sagradamente sin falta un aña den bon y mal tempo, e partido a organisa reunionnan anual di miembresia unda cu e directiva ta presenta un relato di su actividadnan, tesorero ta presenta relato financiero, y ta haci eleccion di cargonan cu tin den partido, y entre otro tambe adaptacionnan den partido na e cambionan den realidad.
Minsiter Lampe a laga sa cu e aña aki den e periodo di COVID19, nan ta e prome partido cu a organisa un reunion anual di miembresia virtual. “Esaki ta mustra na e pueblo votador cu nos ta un partido responsabel, consistente, serio, unda nos tin un trayectoria cu e votador por deposita den su confiansa cu nos no ta un partido aventurero cu ta djis lanta pa lanta, pero nos tin consistencia y principionan pa establece un isla di integridad”, e mandatario a bisa.
A keda dicidi den e reunion di miembresia cu ta haci un cambio di statutonan. Na 2010 a tuma luga e prome cambio di statutonan, ora cu nan a perde eleccion nan a reflexiona kico por a bay fout. A cambia e statutonan na 2010 pa kita un prohibicion: candidatonan riba lista pa por ta ministeriabel. E cambio a wordo haci pa asina por tin mas consistencia den loke ta atraccion di candidatonan riba lista. Na 2020 pues nan ta haciendo segundo cambio di nan statutonan pa kita un otro prohibicion.
E statutonan tabata prohibi cu un parlamentario of minsiter por ta miembro di directiva di Partido RED.
Despues di e experiencia den e ultimo añanan den gobierno, partido RED a mira cu ta importante pa tin dialogo continuo y harmonia entre esnan representando RED den parlamento, ministerraad y directiva.
P’esey a kita e prohibicion ey awor ta mustra cu cambionan di berdad ta tuma lugar y con RED ta adapta na esakinan. Lampe: “A base di esey a keda eligi un directiva nobo di partido RED cu ta bay enfrenta otro aña electoral.” Como presidente a keda sra. Kinsasha Thielman-van der Bliek, y RED ta contento cu ta haya mas participacion di hende muhe y hoben interesa den politica. Como secretario a keda sr. Thomas Ruiz, tesorero Stefano Croes, un otro hoben, y como comisario miembro sin un cargo den directiva a keda sr. Ricardo Croes y minister Lampe, e cinco cabesnan aki lo guia partido RED den e siguiente aña electoral.
Cambio di statuto no ta cambio di principio
Minister Lampe a sigura cu e cambionan aki den statuto no ta nifica cu tin cambio den e partido su principionan. Sr. Ricardo Croes a bini cu algo inovativo den e arena politico di Aruba. E filosofia di RED ta cu esun cu haya mas voto ta keda den parlamento. Ricardo Croes tabata e tercer persona cu mas voto na Aruba anto el a keda como lider di fraccion di RED den parlamento, normalmente bo ‘vote getter’ mas grandi ta bira minister. Pero den filosofia di RED, a bisa cu si kier caba cu stempel parlament, e poder ta den parlamento, e control mester wordo eherce for di parlamento riba gobierno, y p’esey e vote getter ta den parlamento cual a inova e sistema politico di Aruba. “Y nos ta consistente cu e filosofia ey”,minister Lampe a expresa.
‘Mantene bo mente skerpi’
“Mi ta sinti e honor y humildez di a wordo duna e confiansa pa carga e responsabilidad como presidente di directiva di RED Democratico”, sra. Thielman-van der Bliek a expresa. E ta sigui bisa cu di su parti esaki ta un reto pero sigur cu hopi fe, speransa y mira pa futuro, e lo tuma e responsabilidad aki pa honra esnan cu a dun’e e confiansa pa representa e partido. Como hoben y hende muhe e ta sinti orguyoso di por ta representa tambe un parti di e comunidad cu sigur tin mester di haya mas atencion, y pa refleha cu tin hopi poder tambe di hende muhe riba nos pais, como hende muhe y hoben den politica cu diferente vision pa nos pais kibrando e custumber di hiba politica tradicional. “Pa con dificil cu e ta pa trece cambio mi ta kere den nos generacion y den esnan cu tin vision pa futuro, cu ta kere den inovacion pa nos pais y cu sigur hunto den e lucha nos por sinti dilanti”, sra. Thielman- van der Bliek ta bisa.
E ta finalisa na bisando cu ‘mester mante bo mente skerpi’, e politica tradicional ta keda existi, e fake news tambe, pues ta keda na nos como pueblo pa educa nos mes, pa ta consciente y mantene nos mente skerpi pa por discerni kico ta berdad y mentira. “Y a base di e berdad, tuma decisionnan y brinda e sosten unda cu e ta mereci.”