Ursell Arends ta e lider di partido nobo RAIZ y e ta splica dicon nan a lanta un partido politico nobo.
Pa hopi dia caba tabata tin expectativa pa partido RAIZ. Y diabierna, partido RAIZ wordo presenta. Sr. Tai- Foo Lee ta co- fundador di partido RAIZ, y mas den simannan nan lo presenta nan otro candidatonan, como tambe nan plan di gobernacion.
Tanto Sr. Lee como Sr. Arends ta young professional. Y den e ultimo 31 añanan, e participacion di e young professionals den politica ta wordo limita. Tambe e vision cu nan ta biba cun’e y e filosofia di uni un pueblo, no ta biba den e partidonan politico tradicional, y pa es motibo ey nan a dicidi di lanta un partido nobo.
Den e ultimo lunanan, nan a bisa cu RAIZ lo no tin ni bandera, ni t-shirt, ni sticker, ya cu esey polarisa y dividi nos pueblo, y RAIZ ta para pa union. Kico ta haci RAIZ diferente? Un di e puntonan principal, cu ta bin den nan plan di gobernacion, ta transparencia, cu ta algo cu nan ta para p’e. Y nan meta ta pa yega Parlamento. Nan lo haci Parlamento transparente, nan lo haci e aparato gubernamental transparante. Con nan lo haci esaki? Pa medio di tur e tecnologianan available cu tin awendia. Manera diaberna nan a menciona cu na 1982, 12 pais a bin hunto pa firma un Freedom of Information Act. Na 1983, Canada a adopta esaki, y nan a hink’e den otro batch y haci esaki Acces to Information Act. Na Aruba y Hulanda, ya caba nos conoce di 1982 como Wet Openbaarheid van Bestuur. Na Aruba, e ta Landsverordering Openbaarheid van Bestuur. Pero nunca el a wordo cambia pa e era cu nos ta bibando aden, cual ta un era digital. Pesey nan kier cuminsa cambia e leynan, pa cumpli cu regla- y normanan, con un gobierno y un Parlamento por ta transparente cu su pueblo. Y alabes focus ariba e participacion di e pueblo tambe.
Actualmente, RAIZ, al momento no tin niun persona cu tabata riba otro partido politico. Esey no ta e caso. Nan tin caranan nobo, aire fresco nan ta bin ta brinda den politica, y pesey RAIZ ta un partido nobo tambe. A base di basta survey, y despues di 31 aña, esaki ta e prome biaha cu e hobennan entre 18 pa 28 aña, ta representa 32% di total di personana cu por vota. E eleccion aki, e adultonan ta ser pidi pa scucha nan yiunan. Paso e eleccion aki, nan lo no vota solamente pa nan yiunan, pero pa yiu di nan yiunan tambe. Pesey RAIZ kier conscientisa e pueblo, cu e biaha aki tin hopi mas den wega, cu e eleccion aki. Sr. Arends a studia International Management na Canada, y e ultimo 10 añanan el a traha den e mundo turistico y e sa kico nos economia ta come y bebe di dje. Tambe Sr. Tai Foo Lee, co- fundador di partido y colega di partido, tambe tin amplio experiencia, nan ta bon prepara pa sirbi pueblo. Nan ta prefera di yamanan mes, sirbidonan di pueblo, enbes di politico. Por ultimo, Sr. Arends, no ta importa color politico, cual color di bandera bo a representa, no ta importa bo color di cuero, of ken bo ta stima. RAIZ kier union den pueblo y esey nan ta para pe.