E Famia di Partido P.O.R, E Forsa Nobo, ta birando dia pa dia mas grandi. Mr. Andin Bikker tabatin e honor di yama dr. Dellanire Maduro bon bini den e partido. Partido P.O.R, E Forsa Nobo, no solamente a cana den Pueblo y busca informacion di kico ta e preocupacionnan cu ta reina den Pueblo, pero tambe e partido ta haci su maximo esfuerso pa busca candidatonan cu experticio y vision pa por aplica e plan di accion di Partido P.O.R.
Den mayoria di e preocupacionnan cu Pueblo a expresa durante encuentronan a sali afo cu Salubridad na Aruba tin su retonan. Entre otro e listanan di espera pa haya atencion of tratamento ta un preocupacion y e ley di AZV ta hopi anticua. Partido P.O.R, E Forsa Nobo, kier drenta den dimensionnan innovativo y lo bay haci un revolucion y reforma pa miho riba e tematica di salubridad.
Andin Bikker a introduci dr. Dellanire Maduro, un persona cu a studia na La Salle Colege y Colegio Arubano y despues a bay studia na Costa Rica y a gradua como dokter na Ucimed. Dellanire tambe ta un di e studiantenan cu a y ta pasando hopi dolor di cabes na momento cu a termina su estudio, pa e por eherce e funcion di dokter aki na Aruba.
Partido P.O.R, E Forsa Nobo, manera ya caba a yega di bisa, den e prome 100 dianan lo haci e cambionan necesario di nos leynan pa asina reconoce e diplomanan di e propio yiunan di tera cu pais Aruba a duna nan un fiansa pa bay studia den exterior, pero cu hopi di nan na e momento nan aki no por bin nan isla natal, ja cu nan ta keda confronta cu e hecho cu nan diploma no ta wordo reconoci.
E Parlamentario ta kere cu ta imposibel cu na Aruba caminda cu ora no por soluciona un problema medico ta manda e pashent pa keda atendi den regio, pero na momento cu e yiu di tera bay cu fiansa studia den regio y cu kier bin bek su pais, su diploma di estudio di medicina no ta wordo reconoci.
Dr. Dellanire Maduro na su turno a duna un introduccion amplio di su vision y ideanan innovativo con e lo aporta pa mehora salubridad en general na Aruba, entre otro pa medio di cambio y modernisashon di e ley di AZV pa introduci e dimenshon di prevencion, introduci test (“hielprik”) manera cu un baby nace y aplica tratamento si ta necesario na un manera preventivo, y haci testnan preventivo pa cu malesanan cronico. Tambe el a amplia entre otro riba e potencial di turismo medico y centro di estudio.