Diahuebs 19 di September mainta, a tuma luga na Cede di MEP na Santa Cruz un conferencia di prensa pa asina informa prensa riba desaroyo y detayenan di campaña pa eleccion 2024 na december proximo y tambe pa duna prensa oportunidad di haci tur pregunta politico. Presente tawata Lider di MEP Evelyn Wever-Croes y Presidente di Partido MEP, Ricky Hoek.
Lider di MEP a cuminsa e mainta presentando e logo nobo di Partido MEP via un video y a splica e simbolonan tradicional di nos logo. E Logo 2024 – 2028 ta un esfuerso di un ekipo hoben y dinamico cu a pone idea y conceptonan hunto di loke kier a mira e logo representa y a finalisa e diseño un biaha mas cu un concepto modernisa y mas atractivo. Lider di MEP ta gradici tur esnan cu a yuda den diseña e logo nobo di Partido pa e siguiente temporada nos dilanti.
Simbolonan tradicional di Partido MEP desde principio a consisti di solo y parha phoenix. Cu e modernisacion di e Logo di Partido MEP pa eleccion 2024, analisando e exito y trayectoria di Partido cu reto y logronan grandi den transcurso di añanan, e emblemanan a haya un significado mas fuerte.
MEP ta un movimiento di hende (pueblo) un partido prestigioso. E logo ta refleha e desaroyo y persistencia, e movimiento di hendenan cu ta bini hunto, un movimiento grandi cu ta haci cosnan grandi pa Aruba den tempo bon pero tambe den temponan duro y fuerte.
Mescos cu e solo, Partido MEP semper a traha pa pone Aruba briya como Pais y internacionalmente. E solo ta representa nos Pais, cu su retonan pero tambe cu su fortalesa. E solo ta representa e calor cu nos cada un ta carga den dje, e stimacion pa nos pais y e deseo ferviente pa hiba nos pais padilanti.
E parha phoenix cu cara apuntando ariba ta simbolisa e rumbo y enfoke pa traha existosamente pa Pais Aruba. Partido MEP cu cara na laira nos ta bay avansa y hiba nos pais padilanti. E halanan habri di e parha ta representa e movecion progresivo di MEP y e orguyo di ta traha na bienestar di nos Pais.
MEP no ta simplemente un partido. Nos ta un movecion. E MOVECION no tin paracion.
Di ami p’bo, di pueblo, cu pueblo, pa pueblo.
Lider di MEP ta invita nos hobennan di Aruba y e pueblo di Aruba en general, pa ‘join’ nos pasobra nos ta E MOVECION cu ta hibando Aruba den e progreso y prosperidad cu nos kier pa nos pueblo. Hunto, cu bo voto di confiansa y mandato, Partido MEP lo continua cu e trabounan pa logra mas pa Aruba.
