Partido MEP ta cuminsa cu campaña 2021

Riba e ultimo dia di luna di November, lider di partido MEP, sra. Evelyn Wever-Croes ta anuncia cu partido MEP ta cuminsa awe oficialmente cu campana 2021. Como inicio di e Campaña pa Eleccion 2021, Partido MEP a introduci e logo nobo pa Eleccion 2021. E logo aki ta uno dinamico, moderno y un logo cu ta mustra determinacion.

E logo a wordo diseña pa Xavier Maduro, cu ta miembro di e hala hubenil di Partido MEP, HOT. Conhuntamente cu un team a traha pa basta tempo pa por a modernisa e logo, teniendo cuenta cu e hobennan como tambe adultonan, manteniendo e historia di e logo y Partido MEP. Un danki na Xavi pa e tremendo trabou, na e team cu a yud’e, y na demas membro di Conseho di Partido cu a duna nan feedback pa por a finalisa e logo.

E logo nobo di MEP ta mustra e simbolonan tradicional di partido MEP cu ta e phoenix y e solo, e colornan tradicional cu ta geel y cora, den un concepto moderno.
Na indicacion di nos hobennan a pone e phoenix den un efecto di 3-D y pafo di e solo simbolisando e forsa di e phoenix cu ta saca pais Aruba for di cualkier crisis. E phoenix ta para pa forsa, renobacion, speransa y inmortalidad.

Sra. Evelyn Wever-Croes tambe a gradici Directiva di partido bou liderazgo di Presidente di partido Hendrik Tevreden, Secretario General di partido Endy Croes cu ta atende cu tur loke ta organizacion di partido pa Partido MEP por ta prepara pa campaña 2021.

Campaña pa Eleccion 2021lo ta uno completamente diferente cu locual ta custuma cu ne ya cu pais Aruba ainda ta enfrentando e crisis di Covid-19 y lo mester mantene e protocolnan pa cu esaki. Na e momento aki partido MEP ta pensando riba actividadnan ‘drive-thru/drive-by’ y pa haci mas uzo di medionan digital. Mirando e crisis financiero cu Aruba ta aden, no lo tin materialnan disponibel manera custumber.

Partido MEP na e momento aki tambe ta trahando riba su lista di candidato y ta buscando e remplaso pa esnan cu no lo ta riba lista pa e proximo eleccion. E candidatonan nobo lo ser anuncia den curso di otro aña.

“Mi deseo ta pa e campaña electoral aki ta uno di un nivel bon, pa votadonan por haña informacion cu nan mester ora di haci nan escogencia. MEP a logra hopi den e transcurso di e ultimo 3 añanan. Sinembargo Covid a dal y a cambia tur cos na caminda pero e Gobierno aki, Gabinete Wever-Croes a demostra di por goberna no solamente den temponan bon sino tambe den temponan di crisis. Pa cu e Eleccion 2021 votadonan lo mester scoge e gobierno cu por saca Aruba di e abismo y crisis causa pa Covid-19 cu sigur ta un trabou cu lo tuma añanan pa por ser realisa. Covid-19 a causa hopi daño financieramente y economicamente pa Aruba. Awor ta momento pa no solamente reconstrui nos pais sino hib’e na e siguiente nivel tambe”, Lider di MEP Sra, Evelyn Wever-Croes a termina bisando.

Comments

comments