Partido MEP ta celebra dia di Prensa den unambiente Ameno

Partido MEP a celebra dia di internacional di prensa, cual ta awe 1 di September, hunto cu prensa invita durante conferencia di prensa den un ambiente ameno na unda cu Evelyn Wever-Croes a cuminsa na felicita y gradici prensa pa e labor importante cu nan ta eherce den comunidad pa brinda informacion na un manera eficas. Despues nos a brinda e prensa presente un desayuno y na final nos a entrega un bunita obsekio na cada un presente.
“Prensa den cada pais ta wordo considera un pilar pa garantisa democracia di un pais. Y democracia ta locual nos ta kere aden cu ta trece bienestar pa un pueblo. Libertad di prensa ta un derecho fundamental cu aki na Aruba nos tin cu protehe. Nos no a conoce e libertad aki semper. Y ainda tin paisnan cu no conoce libertad di prensa.
Na Aruba nos tin e dicha y e bendicion pa por tin e libertad di prensa. Y prensa y tambe nos comunidad mester respeta esaki. Gobierno, ciudadano y institutonan mester respeta e libertad di prensa y duna prensa espacio pa asina cada miembro di prensa por haci su trabou na un manera corecto segun su consenshi na un miho manera. Un prensa obhetivo lo logra esaki”, lider di MEP a bisa.
Den su discurso, Evelyn Wever-Croes a felicita tur esnan cu ta labora den prensa. Alabes el a gradici cada miembro di prensa pa nan trabou y dedicacion, bisando cu no ta tur ora por ta di acuerdo cu otro. Pero esey ta nifica cu nos tin libertad den prensa contal cu e wordo haci den un forma respetuoso y nos por sigui cu e mes un meta cu ta hiba e pais padilanti.
“E meta principal di prensa ta pa duna informacion y e pais Aruba mester di hopi infomacion”, sra Wever-Croes a bisa.
Sra Evelyn Wever-Croes a termina ta duna un danki na tur presente y ta desea tur miembro di prensa hopi exito cu tur e labornan cu tin nos dilanti.
“Nos ta bay drenta un aña di campaña cu nos por bisa cu lo trece retonan adicional pa prensa. Un biaha mas mi kier a felicita y gradici di curason cada miembro di prensa pa e cooperacion na nos partido y pa nos cu ta den Parlamento pa asina nos mensahe por yega cerca e pueblo. Sin prensa nos mensahe no ta yega. Pabien y sigui defende e libertad di expresion cu nos tin awe”, sra Evelyn Wever-Croes ta termina bisando.

Comments

comments