Aki ta sigui e carta habri pa Toko Winklaar cu partido di MEP a pone publicamente pa tur hende por lesa.
Oranjestad,
Aruba,
Diaranson 24 di maart, 2020,
Sr. Winklaar, ricibi un cordial saludo,
Nos di e partido prestigioso di Aruba, MEP a tuma nota cu sr. Winklaar y su corant “Awe Mainta”, tin un interes especial den formacion di lista di partido MEP. Y ta logico tambe pasobra e lista di Partido MEP lo ta e lista ganado di e siguiente eleccion, y e atencion cu sr. Winklaar ta duna na e formacion di lista, lo yuda nos logra nos meta mas lihe. Nos kier informa sr. Winklaar cu nos ta aprecia e atencion y interes.
Na e momento aki Lider di Partido MEP ta formando su ekipo pa bay eleccion na september venidero. E proceso aki ta un proceso hopi serio y ta tuma su tempo. Partido MEP ta busca candidatonan serio y integro, cu ta pone interes di pais Aruba na prome luga.
Lo tin candidatonan cu lo aparece riba e siguiente lista, y lo tin candidatonan cu no lo aparece riba e siguiente lista. Ademas lo tin candidatonan nobo y di hopi peso, pa fortifica e lista.
Kende lo aparece riba e siguiente lista lo bira conoci proximamente.
Pa loke ta e speculacionnan ken lo bira minister, esey ta depende di hopi factor, y principalmente di e opinion di nos votadornan. Pa esey nos mester warda dia 24 di september yega.
Mientras tanto partido MEP ta gradici sr. Winklaar pa e atencion, y si sr. Winklaar kier sigui specula, haci’e libremente. E ta yuda nos pa promove e lista ganado di eleccion 2021.
Atentamente
Partido MEP