Pa 1 or y 40 di merdia, partido MEP ta yega Stadhuis, den un caravana bastante grandi pa asina haci entrega di nan lista di candidatonan pa eleccion 2017. E caravana aki tabata compaña pa ambiente musical y cu’n grupo grandi di fanatico hunto cu e candidatonan, a compaña nan lider y su candidatonan.
Lider di partido, Sra. mr. Evelyne Wever- Croes a haci entrega di e lista na presidente di Conseho Nacional Electoral, Sr. Glenn Thode. Despues di e pasa e inspeccion necesario, e lista a wordo aproba door di Conseho Nacional Electoral.
Sra. Evelyne Wever- Croes a bisa di ta orguyoso di por a lidera e partido MEP. Un ekipo di persona, manera cu a bisa na mas di un ocasion, cu a dun’e e espacio pa traha e lista, cu segun Sra. Wever, ta e lista victorioso. Lista cu ta bay gana e eleccion aki. Nan tin un combinacion di caranan nobo, conoci si den comunidad, pero nobo den politica, combina cu candidatonan ya caba conoci den politica, cu experiencia den politica. E combinacion di young professionals, hendenan hoben, hunto cu personanan mas madura, cu mas experiencia. E combinacion aki ta bay haci e lista exitoso.
Sra. Wever a bisa cu semper ora di trahamento di lista, tin cierto tensionnan. Pero e tin un team dedica dedica na nan pais, cu curason pa nan pais, cu curason pa e partido. E importante ta tin comunicacion. Ora di busca personanan pa subi lista, ta busca persona cu tin amor pa nan pais. Un persona asina ta duna espacio pa traha na interes di un pais.
Nan a entrega un lista di 29 candidato. E interes ta grandi pa partido MEP y e expectativanan ta grandi pa e cambio. Despues di e caba di forma e lista, a yama un partijdraad extraordinario na Cede di MEP pa asina presenta esaki na e candidatonan. Y despues a pone ariba rednan social.
Por ultimo Sra. Wever- Croes a bisa cu el a presenta e ekipo cu lo trece e cambio tan anhela pa nos isla.