Diabierna mainta pa mas o menos 9 or di mainta, partido MAS tabata e prome partido cu a yega Conseho Nacional Electoral, pa asina haci entrega di nan lista pa eleccion na September 2017. E candidatonan a haci nan entrada cantando e himno nacional di Aruba.
Representante Sra. Y.M. Winklaar a haci entrega e lista di Movimento Aruba Soberano, MAS, cu un total di 8 candidato cual lista a wordo verifica pa Conseho Nacional Electoral cu tur cos tabata na ordo.
Sr. Henriquez a splica cu tur cos a cana bon, hopi smooth y e ta hopi contento cu e lista y e candidatonan cu segun Sr. Henriquez ta haci e diferencia y ta e solucion pa e pais aki. El a splica cu nan a dialoga sanamente cu otro. E enfoke principal tabata pa traha cu otro, na bienestar di nos pais.
Nan tin un total di 8 candidato, cual Sr. Henriquez a splica si en caso nan haya 8 asiento, den caso cu pueblo di Aruba bendicionan nan cu esaki, e 8 nan lo bay Parlamento y lo enfoca ariba un Zakenkabinet, pa cual nan ta sigur di haya e cooperacion di parti di Hulanda, segun Sr. Holmo Henriquez, lider di partido MAS.