Partido MAN ta elegi y instala Steven Martina como su lider politico nobo

WILLEMSTAD – Djadumingu atardi, 17 di Mei 2020, Partido MAN a realisá un kongreso ekstraordinario mediante fasilidatnan di teknologia moderno i Internèt. E punto di agènda prinsipal di e kongreso ku a tuma lugá di un forma virtual entre miembronan tabata elekshon i instalashon pa skohe un lider polítiko nobo pa Partido MAN.
E elekshon tabatin komo resultado ku miembronan di partido MAN a skohe Dr. Steven Martina komo nan lider polítiko nobo pa medio di aklamashon.
E proseso pa elegí un lider polítiko nobo a inisiá ya for di aña pasá despues ku e lider saliente, Ingeniero Hensley Koeiman, a informá direktiva ku e ta pone e puesto di lider polítiko na disposishon di partido. Na kabamentu di 2019 a klousurá e proseso durante kua miembronan por a postulá nan mes pa e funshon di lider polítiko. “E proseso a kana konforme statuto i reglamentunan di kas,” presidente di e partido MAN, Dr. Yves Schoop, a informá.

“Nos a plania un kongreso ekstraordinario pa tene e elekshon ku lo mester a tuma lugá dia 21 di mart 2020. Ora ku Gobièrnu a tuma e medida di ‘shelter at home’, den kuadro di e pandemia di COVID-19, pa evitá ku e vírus di korona lo a plama na Kòrsou, Partido MAN a tuma e desishon pa posponé e kongreso ekstraordinario te ku otro aviso,” e presidente di partido MAN a sigui informá. “Otro medida ku Gobièrnu a tuma tabata ku no por a tene reunionnan òf otro tipo di evento kaminda un kantidat di mas ku 4 hende por bin huntu. Esaki a pone ku partido MAN a yega na e desishon pa organisá i realisá e kongreso ekstraordinario di un forma virtual hasiendo uso di teknologia moderno i internèt. Despues di vários reunion di direktiva i otro órganonan di Partido MAN, ku a tuma lugá di un forma virtual, e kongreso ekstraordinario virtual a bira un realidat pa medio di teknologia moderno i internet. Esaki ta un novum den arena polítiko di kua Partido MAN ta hopi orguyoso. Esaki ta prueba ku Partido MAN ta brasa desaroyonan nobo ku tin resultado positivo pa nos pais i su komunidat,” Dr. Schoop a kontinuá bisando. “Nos ta inisio di un era nobo pa mundu i nos pais, i Partido MAN, despues di a partisipá pa 49 aña na desaroyonan importante den historia di nos islanan, ta determiná na sigui kontribuí na adelanto di nos komunidat durante e añanan ku ta sigui.”
Dr. Steven Martina di su banda a bisa ku e ta honrá pa e konfiansa ku miembronan di partido MAN a pone den su persona pa ta su lider polítiko. “Mi ta orguyoso di por sigui duna mi kontribushon na kresementu di partido MAN ku na 2021 ta kumpli 50 aña di eksistensia. Durante e trayektoria di kasi 5 dékada e partido MAN a enfrentá hopi reto i nos tur ta konsiente ku e époka ku nos ta biba aworakí tin retonan fuerte nos dilanti. Nos komunidat a pasa den hopi tormenta, pero semper a sa di tene duru huntu den seno di famia, organisashonnan gubernamental, komersial i sosial pa atendé ku retonan. Mi ta konsiente di e responsabilidat ku ta wardá mi persona i nos partido, pero mi a skohe pa duna bèk na mi komunidat, pa oportunidatnan ku ami a risibí pa desaroyá mi mes komo persona i profeshonal. Huntu ku mi famia, mi tata Sr. Don Marina ku ta kofundadó di Partido MAN, nos a tuma e desishon pa, huntu ku tur persona i organisashon ku stima nos dushi isla, pa traha na bienestar di nos komunidat en general. Nos ta habrí pa traha ku tur individuo i organisashon ku ta deseá lo mihó pa nos pais. Tur logro importante a bini despues di sakrifisio i trabou duru en konhunto. Nos ta un komunidat kreativo ku, no opstante di sierto limitashon, a prueba di por realisá kosnan grandi. Mi ta sigur ku nos por sali dilanti atrobe despues di e set-backnan konosí ,” Dr. Martina a ekspresá.
“Huntu ku nos direktiva, i tur miembro mi ke ekspresá palabranan di gratitut na nos lider saliente, Hensley Koeiman, p’ e trabou realisá na timon di partido MAN. Hensley por ta orguyoso ku el a sigui kultivá e loke nos antesesornan a planta pa nos. Hensley por ta alabes sigur ku nos ta orguyoso di por a eksperensi’é komo lider polítiko, Minister Presidènt, Minister pa Desaroyo Sosial, Labor i Bienestar, miembro di parlamento i konseho insular pa Partido MAN. Nos ta spera di por sigui konta ku su eksperensia na tur momentu ku nos hasi un apelashon na su persona,” Dr. Martina a klousurá bisando.

Comments

comments