ISTANBUL, Turkia- E Comision Electoral di Turkia (YSK) dialuna ultimo a cuminsa un di tres ronda di conteo nobo di e votonan di e distrito Maltepe di Istanbul. Esakinan a wordo considera invalido dia 31 di maart ultimo, según e emisora CNNTürk.
E partido gobernante Partido di Husticia y Desaroyo (AKP) di e presidente Turco, Recep Tayyip Erdogan, y su formacion di aliadonan, e ultra derechista Accion Nacionalista (MHP), a nenga di firma e resultado di e dos reconteo di e votonan cu a wordo declara nulo. Nan a exigi pa bolbe conta e votonan.
Ta spera cu e di tres recuento aproba door YSK lo tin consecuencia un retraso adicional di e anuncio tan spera di e resultadonan oficial di e eleccionnan na Istanbul.
AKP tambe a pidi pa ripiti e eleccionnan den e distrito di Büyükçekmece di e ciudad di Bosforo, pa supuesto fraude y a impugna “pa motibonan extraordinario”, e resultadonan preliminar di e eleccion pa alcaldia di Istanbul.
Den e ciudad aki, cu’n total di 8,8 miyon voto deposita, e social- democraat y opositor Partido Republicano di Pueblo (CHP) a gana cu’n diferencia inicial di 23 mil voto cu a keda reduci na 14 mil despues di un di dos conteo di e votonan cu a wordo declara nulo den e prome recuento.
Oposicion ta acusa e partido gobernante di ta haci tur lo posibel pa obstaculisa e anuncio oficial di e su aparente derota.
“AKP ta purbando di retrasa e declaracion di e victoria di CHP di Istanbul y haci tur lo posibel pa para e recuento di voto na Maltepe”, Seyit Torun, vic-presidente di e partido opositor a declara na EFE.
“Nos a bisa anteriormente cu nos lo kier pidi un ripiticion di e eleccionnan di Istanbul uzando nos derecho na obhecion. Nos a completa nos preparacionnan. Pronto nos lo manda nos apelacion na YSK”, e vice – presidente di AKP, Ali Ihsan Yavuz, a declara ariba su cuenta di Twitter, diadomingo ultimo.
YSK a anuncia cu e lo analisa conhuntamente cu e peticionnan di bolbe bek na e urnanan na Büyükçekmece y den henter e ciudad.