KRALENDIJK, Bonaire – E existencia di e partido politico ERA NOBO , cu dia 22 di januari 2019 a presenta su mes como e alternativa nobo ariba e isla, ya caba ta core peliger, prome cu el a cuminsa mes.
E partido dirigi door di Eric Soleano, diasabra a wak seis miembro prominente di su partido tuma nan retiro. Despues di e presentacion di siman pasa, e malcontenco a sigui crece, vooral cu e liderazgo di Soleano cu ta tild’e di hiba un maneho ‘dictatorial’. E miembronan cu a entrega nan retiro ta Imarisha Hagens, Edwina Molina, Mirchonella Winklaar, Michaelangelo Domacassé, Jay Frans y Ferdinand Bernabela.
Na su turno, Soleana ta culpa e desertornan di ‘manipulacion’. Segun Soleana, por papia di un ‘acto premedita’ pa asina haci daño na e partido. Dialuna e partidonan mester entrega nan lista di candidato pa proximo eleccion.
Soleano no ta preocupa mucho cu e retiro aki y ta bisa cu ERA NOBO lo ta mas fuerte cu nunca den e eleccion. Soleano y ERA NOBO ta wordo mira como oponentenan fuerte di e curso actual di e isla y ta haya cu Boneiro ta wordo demasiado domina door di Hulanda.