Manera partido di Pueblo Arubano AVP a anuncia, den luna di November awor lo yuda yena formularionan riba entradanan di 2015 pa belasting. Manera tur aña lo duna e servicio aki tanto na Playa como na San Nicolas. Na Playa e servicio lo wordo duna den Cas di Partido AVP den Rancho. Na San Nicolas e servicio di yena formulario di belasting lo wordo duna den YMCA Club net pabou di Joe Laveist Ball Park. E fechanan pa e atardi/anochinan di servicio lo ta na:
Playa: dianan 2, 9 y 23 di November entre 6’or y 9’or di anochi.
San Nicolas: dianan 3,10 y 24 di November entre 7’or y 9’or di anochi.
Riba tur e atardi/anochinan aki lo tin un grupo di experto pa yuda yena e formularionan. Di e forma ey, mescos cu tur aña, ta bin cla lihe y por yuda hopi hende.
Ta corda tur hende pa bin prepara cu tur documento necesario. Esaki ta e documentonan cu por tin mester di dje:
e formulario pa yega e entrada pa belasting cu bo a haya na cas;
e resumen di bo entradanan den e aña 2015. Bo por haya esaki di bo doño di trabou of e compania unda bo ta traha. Si bo ta un pensionado bo ta haya esaki di SvB of di APFA;
un resumen of comprobante di tur otro entrada cu bo a haya na 2015;
e comprobante di e interes cu bo a paga na banco riba credit card of riba fiansa cu bo tabata paga na 2015;
comprobante di tur gasto adicional pa cuido medico di bo of un familiar cu ta depende di bo.
comprobante di gastonan haci pa estudio di bo mes of un familiar cu ta depende di bo;
comprobante di gastonan cu bo a haci pa cuido di un familiar cerca.
comprobante di otro gastonan iregular of inusual cu bo mester a haci na aña 2015
Trece tur esakinan ora bo bin pa yena e formulario di belasting cerca nos y bin cla lihe.