N.V. ELMAR a organisa e bunita proyecto di “ELMAR Mural Project”. Den e proyecto aki muchanan di diferente scol a participa diseñando un pintura cu tabata relaciona cu e topico di Aruba Sostenibel. Na final di e proyecto a scoge 10 ganado kendenan a haya oportunidad pa traha un mural na e cura di N.V. ELMAR na Hato bao guia di e artista Robert Tromp. E muchanan por a firma e mural cu nan mes a traha.
Ta trata di un mural di 60 meter hancho cu tin riba dje e pintura final cu e muchanan a traha reflehando “Un Aruba Sostenibel”. N.V. ELMAR ta hopi orguyoso di por a bira parti di e bunita iniciativa aki saliendo for di e punto di bista cu e mensahe y vision ta coincidi cu e principionan di e compania.
Mester menciona cu e participantenan a ricibi un calender recuerdo for di N.V. ELMAR cu e pintura original. Nan a keda masha contento mes. Pronto nos lo parti e calendernan pa nos clientenan tambe.
Ta invita henter comunidad pa pasa dilanti e edificio di N.V. ELMAR na Hato y admira e tremendo obra di arte cu nos muchanan a diseña.