Willemstad Curacao: 15 kandidato di e Promé Formashon Militar (EMV) pa Militar di Karibe dia 5 di Mart a kuminsá na nan gran ehersisio final, e último paso, promé ku ofisialmente nan por risibí nan barèt Militar. E ehersisio final ta finalisá riba 11 di Mart ku un marcha di 25 kilometer bai Fort Amsterdam, na unda nan lo interkambiá nan barèt di entrenamentu pa e barèt di Militar Operashonal.
9 Yu di Korsou i 6 Arubiano ta den e último fase di nan entrenamentu pa Militar di Karibe. Durante e entrenamentu final, ku a kuminsá djárason 5 di Mart, e kandidatonan mester apliká tur loke nan a siña den un senario mas realístiko posibel i demostrá esakinan. E ehersisio ta tuma lugá na diferente lokalidat na Kòrsou, entre otro den besindario di Wacao, Boka Santu Pretu, Ronde Klip i Fuik. E ehersisio final ta klousurá ku un marcha di 25 kilometer. Durante e último kilometer nan di e marcha e kandidatonan ta keda kompañá musikalmente pa e drùmer i floutistanan di Kuerpo di Marina. Huntu nan ta kana mainta djamars 11 di Mart pa mas o ménos 07:00 or di mainta, pasa den Otrobanda, via di Brùg di Ponton, bai nan destino final: Fort Amsterdam, na unda nan lo yega mas o ménos 07:30 or. Einan nan ta risibí nan barèt ofisial. Un momentu spesial pa e partisipantenan, durante kua famia i amigunan mas di aserka lo ta presente pa presensiá e seremonia ku orguyo.
Mas ku 300 kandidato a mèldu aña pasá pa e kurso pa bira Militar di Karibe. Entre nan 39 kandidato a slag, pa e prosedura di selekshon severo, i a kuminsá na ougùstùs 2024 ku nan entrenamentu. Durante shete luna e kandidatonan a siña durante e kurso rígido i intensivo entre otro e destresanan básiko di Militar, téknikanan di bataya, i kon pa anda ku armanan militar.
Despues di alkansá nan estudio e Militarnan di Karibe ta keda ubiká den diferente funshonnan (operashonal) na Kòrsou i Aruba. Nan lo por haña diferente tarea, di kontrol di akseso, te na mantenshon di órden públiko i seguridat, riba petishon di outoridatnan lokal. Tambe nan lo partisipá na ehersisionan pafó di Kòrsou i Aruba i nan ta trein huntu ku diferente sosio di seguridat. E Militarnan di Karibe ta den servisio di Ministerio di Hustisia na Korsou i nan ta labor na Defensa den Region Karibe Hulandes. Mas o menos 220 Militar di Karibe huntu ta forma un unidat operashonal importante di Defensa.
