Na luna di september dos artista di Aruba sra. Angela Baidez y sra. Mirella Koolman-Thielman a wordo invita, a base di nan obranan scohi riba e foro di arte digital di Museo el Prado di Madrid, pa participa na un exposicion en bibo na Barcelona. E tabata trata di e exposicion Huellas de Cataluña bou auspicio di y na e cede mes di FEDELATINA. Esaki ta un Federacion di entidadnan Latinoamericano na Cataluña.
E exposicion a habri dia 13 di september y a keda pa un luna pa por bishitele. Sra. Baidez y sra. Koolman-Thielman ambos a haya certificadonan di participacion y a representa Aruba, mientras acompaña pa artistanan di otro islanan di Caribe y paisnan di Latino America. Pues un bon momento cu Aruba su nomber a bay internacional bou di un delegacion prestigioso y selecta, y dimes exponi na tur bishitante di e exposicion. Bou di un esfera hopi uni e artistanan a apoya otro y pasa un bon tempo hunto.
Sra. Baidez y sra. Koolman-Thielman ta yama un danki grandi na het Cultuurfonds Caribisch Gebied cu a apoya cu costonan di vuelo y estadia, cu ta cay bou di un areglo fiho cu e fondo tin pa artista haya chens pa internacionalisa.
