Stichting Rancho lo tin un actividad di Bendemento di mata y Rancho Walking Tour pa Dia di Betico. Presidente di Stichting Rancho, Clifford Rosa ta splica nos cu normalmente Stichting Rancho tur aña ta cuminsa cu su prome actividad pa publico, pero den e caso aki por medio di e pandemia tog a midi kico lo haci y dicidi tog pa haci algo pa comunidad.
Esaki ta algo cu ta pidi pa registra na tempo pa bin haci un caminata/Walking Tour. Cada biaha ta bin algo acerca na dje y e tematica e biaha aki tin di haber cu e celebracion di 200 aña di Oranjestad, anto esey ta locual lo purba visualisa tambe den e caminata aki. “E ta parti di nos caminatanan educativo, cual ta sigur algo cu nos lo accentua hopi riba dje, pa asina ey nos keda duna loke e fundacion t’ey pa haci, conservando e historia y cultura di bario di Rancho, y awor cu un enfoke mas amplio riba Oranjestad tambe, “ segun sr. Rosa.
Esaki ta un proyecto den aire liber, e bendemento di mata lo tuma lugar den e Hof’I Bario Rancho caminda lo tin un setting pa pasa, cumpliendo cu tur regla di DVG, unda bo por cumpra un mata, sinta bebe te of koffie. “Un mainta di dia di Betico poco diferente pero si cu algo pa comunidad y tog asina conservando parti di nos herencia.”