E aña aki un biaha mas, Ministerio di Cultura, Departamento di Cultura Aruba y Comision Celebracion Dianan Nacional, ta bolbe duna oportunidad na nos poetanan pa skirbi nan poesia y participa den e competencia di ‘Poeta di Patria 2017’.
Durante e luna cultural aki, arte y creacion literario ta bibo. Ta abo so falta pa yega y participa cu bo poesia dedica na nos Patria.
Pa competi ta facil. Djis manda bo poesia via e-mail: [email protected], prome cu diasabra 11 di Maart venidero.
E reglanan pa por participa ta lo siguiente:
Minimo 4 strofa y maximo 7 strofa;
Cada strofa mester consisti di 4 linea;
Mester rima (mester ta un);
Topico mester ta Aruba su Dia Nacional;
Poeta por manda te cu 3 poema pa participa;
Bo persona mester ta dispuesto pa declama bo poesia.
E 10 pre-finalistanan lo mester presenta nan obra riba diaranson 15 di Maart 2017, den Museo Historico Arubano / Fort Zoutman, na unda lo saca 3 ganado.
Ban duna balor na nos idioma materno Papiamento y su bon uzo.