GENOA, Italia- Un pida di un viaducto di e autopissta A10 den e ciudad Italiano di Genova, a cay diamars mainta. Esaki a wordo confirma door di bomberonan, y al parecer tin varios vehiculo cu lo a cay den bashi.
Riba e prome imagennan difundi pa medionan di comunicacion por wak e brug, di cual falta varios meter, mei mei di e nublina riba e zona industrial.
Segun bomberonan, e brug yama Morandi a cay rond di merdia. “E ekiponan di bombero ta participa masivamente, e ekiponan di rescate y nan cachonan ta wordo mobilisa”, nan a anuncia ariba Twitter.
E seccion di e brug cu a cay ta pasa ariba un zona densamente pobla. E gran parti di e fragmentonan di e brug a cay den riu, pero algun seccion lo a cay ariba edificionan residencial y industrial.
Informenan preliminar a señala cu e brug lo a cay debi na un fayo structural. Ademas, ta sospecha cu bou di e ruinanan lo tin varios persona y vehiculonan.
E minister Italiano di Infrastructura y Transporte, Danilo Toninelli, a califica e caida di e brug como un “tragedia inmenso”.
“Tin varios morto entre esunnan cu a cay for di e brug y a keda pega bou di e ruinanan”, e director di servicio di emergencia local, Fransisco Bermano, a bisa na e agencia Adnkronos.
Autoridadnan local a cera parti di e autopista A10, na ambos banda di e viaduct afecta.
E brug di Morandi, construi den e decada di 1960, ta ubica entre e dos distritonan di Sampierdarena y Cornigliano. E ta midi mas di un km y ta na un altura di 90 m riba e superficie.
E brug aki a cay durante un tormenta repentino, segun autoridadnan a informa.
E canal di television Sky Tg24 a bisa cu’n pida di 200 m di e brug a cay den e zona industrial y bomberonan ta teme pa e conexionan di gas.