CARACAS, Venezuela- Oposicion Venezolano a convoca un paro general di 24 hora pa diahuebs 20 di Juli, den un accion di protesta cu ta parti di e “fase superior di e lucha civico”, activa despues di e consulta popular cu a desaroya diadomingo ultimo contra di e proceso constituyente di gobierno.
E paro civico ta pa presiona e presidente Nicolas Maduro pa e cancela e convocatoria pa un Asamblea Nacional Constituyente, despues di a logra un voto masivo di rechaso den e eleccion simbolico aki.
E anuncio a wordo haci door di e diputado opositor y vice- presidente di Parlamento Freddy Guevarra, kende ta fungi como vocero di e aliansa opositor Mesa de la Unidad. Guevarra a bisa tambe cu diaranson nan lo haci publico e prome pasonan “pa conforma un gobierno di unidad nacional”.
“Nos ta haci un yamada na e pais completo pa diahuebs nos uni den un protesta masivo y sin violencia, den preparaciom di e escalada definitivo cu lo ta otro siman”, Guevara a bisa, haciendo referencia na un paralisacion di tur actividad, formal y informal.
Como parti di e strategia, Parlamento domino pa oposicion, diabierna no nombra magistradonan nobo pa e Tribunal Supremo di Husticia, cual e ta acusa di “golpi di estado” na Venezuela, cu fayonan cu ta mina e facultadnan di e Legislativo.
A pesar di e anuncio di su ofensiva, Guevara a sigura cu MUD ta dispuesto na dialoga, semper y cuando e gobierno retira e convocatoria pa un eleccion, cual lo tuma luga dia 30 di Juli proximo.
E accionnan aki ta marca e comienso di loke MUD a defini como “hora cero”, un strategia pa pusha un desenlace di e conflicto, despues di a logra e voto di 7.2 miyon Venezolano den un eleccion simbolico di diadomingo, contra di e presidente y di su Constituyente.
Oficialismo a cuestiona e resultadonan aki, y a señala cu e proceso ta ilegal, door cu e no a wordo apoya door di e Conseho Nacional Electoral (CNE), acusa door di oposicion di ta na fabor di gobierno.
Fuente: www.elespectador.com