CARACAS, Venezuela – E Asamblea Nacional di Venezuela (AN), domina pa oposicion, diaranson a designa un hunta adminsitrador pa controla e industria petrolero, como tambe e empresa estatal PDVSA y su filial na Merca, Citgo.
E decision di e legislativo a wordo aproba pa e mayoria opositor den Congreso, despues di a presenta un informe di e Comision di Energia y Petroleo na encargo di e diputado Elias Matta. Cu e medida aki, Simon Antunez, Gustavo J. Velasquez, David Smolansky, Carlos Jose Balza y Ricardo Alfredo Prada ta integra na e hunta di directiva di PDVSA, un empresa duramente golpia pa un crisis di productividad y investigacion pa corupcion.
Mientras tanto, e specialista Luisa Palacios lo ta na cabes di e directiva di PDV Holding INc., compania cu ta eherce como doño di Citgo.
Edgar Rincon, Oswaldo Nuñez, Fernando Vera, Elio Tortolera y Andres Padilla lo ta hunto cu Palacios.
Parlamento tambe a apunta Palacion y Rincon na cabes di Citgo Holding Inc., como tambe Angel Olmeta, Oswaldo Núñez, Javier Troconis y Rick Esser.
No tin informacion di con e proceso di seleccion a bay, ni tampoco a duna detayenan di e experiencia di e designadonan.
Segun opositornan, e decision lo permiti “e proteccion di activonan di e compania Citgo”, di demandanan cu Venezuela ta enfrentando pa incumplimento di obligacionnan miyonario.
Un serie di sancion di parti di e gobierno di Donald Trump ta colga ariba cabes di e industria petrolero Venezolano, y esakinan lo wordo kita di manera automatico ora cu Nicolas Maduro, bandona poder.
Door di esaki, parlamento ta duna e recien nombra hunta di Citgo pa busca ariba mercado “petroleo pisa alternativo na un costo mas abao posibel”, mirando e imposibilidad di PDVSA pa provee cu esaki.
E accionnan aki ta forma parti di e ofensiva opositor pa debilita Maduro y fors’e pa bandona poder, cu e ta eherce desde 2013, y cu e anti- chavistanan ta considera cu e ta “usurpando” e poder, for di januari ultimo, ora cu el a huramenta pa un mandato nobo di 6 aña. Esaki no ta wordo reconoci pa un gran parti di e comunidad internacional.
Guaido, di su parti, a cataloga como historico e acuerdo pa apunta e directiva nobo, ya cu esaki lo “proteha” cada activo den desaroyo di Venezuela.