Reces e aña aki, cu ta delaster dia di trabao lo ta 21 di december. Esey kiermen cu ainda tin 6 siman pa 8 siman, caminda cu tin paar di ley importante pa bay trata y pa wordo aproba of desaproba den parlamento. Presidente di parlamento, Sr. mr. Ady Thijsen ta amplia.
Un di e leynan ta e Aanbestedingsverordering, cu ta un ley hopi importante, ya cu e tin di haber cu e ley di bidding. Ta prepara pa wordo trata den parlamento. Un otro importante ta e Jaarrekening 2016, cu mester wak si ta wordo aproba of no. E ley aki tin basta problema cun’e, den sentido con gobierno a handle e placa di e pueblo. Den e caso aki, e ta importante ya cu e ta e prome presupuesto cu ta wordo trata, cu tabata un aña full bou supervision di CAft. Ta wak tambe si tabata tin cualke efecto, door cu e tabata bou supervision. E ta bay ta un ley pa debati hopi riba dje. Tambe e ley LAft, cu ta e base di CAft, tambe mester wordo trata. E ta algo hopi importante, e parti di Aruba su supervision di finanza. Parlamento a manda un mocion caba, cual lo bira e wes’i lomba, ya cu e ta encera cu parlamento di Aruba ta esun cu ta dicidi, esun cu ta pone tambe e cuadro den con ta bay supervisa loke ta trata e placa, e finanza di Aruba. Esey mester ta hopi duidelijk. E no ta bay manera antes, cu CAft ta purba yega na cierto norma pero ta lubida cu tin mas cos ta hunga un rol den esaki tambe. E ley LAft tambe lo bira un debate hopi fuerte ariba dje.
Por ultimo, e presupuesto supletorio 2018 cu tin cu wordo pasa y tambe tin e begroting di 2019 mes tambe pa wordo trata. A priminti cu lo trata presupuesto di e aña siguiente, prome cu aña caba. E no mester ta manera antes, unda cu a trata 2018 te na april.
Presupuesto mester wordo trata prome cu aña caba y esey ta sagrado pa parlamento. Sr. Thijsen ta pone enfasis, pa gobierno haci su parti pa bin parlamento pa cuminsa traha, haci pregunta pa asina e wordo trata. Te asina leu, Sr. mr. Ady Thijsen, presidente di parlamento tocante leynan cu mester wordo trata prome cu fin di aña