A haci un peticion na Presidente di Parlamento, Sra. Mervin Wyatt Ras, pa yama Minister di Hustici, Drs. Arthur Dowers, tocante criminalidad. Sra. mr. Desiree de Souza- Croes ta splica.
A pidi pa Sr. Douwers bin den Parlamento y splica kico ta e accionnan cu a tuma, desde ultimo reunion y kico ta e resultado di e accion aki. Tambe Parlamento lo kier sa kico a haci cu e placa cu el a haya for di gobierno algun luna atras, pa combati criminalidad. Otro informe cu Parlamento lo kier haya ta si en berdad ta debi na personana cu ta bin di afo, aunke por mira cu autoridadnan ta trahando duro riba e tema aki.
Tabata tin varios mocion den Parlamento, caminda a pidi Minister pa bin cu camara, no solamente den area di hotel pero tambe den barionan. Mester a bin cu un proyecto piloto tocante esakinan den barionan problematico. Sra. de Souza lo kier sa, kico a para di e proyecto aki y ki tempo lo por spera cu esaki por wordo amplia. ‘
Sra. de Souza, ta spera cu ainda e siman aki, Presidente di Parlamento por duna un dia unda cu por reuni cu Minister, hunto cu e hefenan di departamentonan pa nan tambe trece nan informenan dilanti.
Ta spera cu oposicion tambe lo ta presente ya cu nan tin varios luna sin presenta na trabao. Sra. de Souza ta manda invitacion pa Sra. Wever, pa e bin Parlamento y cuestiona Minister.
Tin un tendencia hopi peligroso, caminda criminalnan ta drenta den hogarnan, e luga caminda cu un persona mester sinti su mes sigur, caminda tin hasta muchanan cu ta bira victima den casonan asina. Ta increibel cu Aruba mester pasa den esaki, pero e tin pleno confiansa den Cuerpo Policial y cu e malhechornan aki lo wordo treci dilanti mesa berde y haya nan castigo. Pero importante awo ta pa pone un stop na esaki.
Esaki tambe ta un di e motibonan pa cual ta pidi un reunion cu Minister pa tende di su banda, kico ta su plan di accion, algo rapido y cu man fuerte pa asina e poblacion por sinti nan mes sigur bek den nan mesun cas.
E neighborhood watch segun de Souza, mester bira un institucion, pero lo ta bon pa polis wordo envolvi den esaki.