Presidente di Parlamento, Mervin Wyatt-Ras, a indica cu Parlamento lo bay pone mas presion pa haya contesta for di Gobierno pa loke ta presupuesto 2017.
A ricibi e presupuesto di pais Aruba dia 1 di September di e aña aki, cumpliendo cu nos Constitucion. Gobierno a entrega e biaha aki na tempo y despues dia 20 tambe di September, a tene e reunion di Comision Central unda cu a palabra tambe cu e preguntanan lo wordo entrega dia 18 di October cu a pasa y a duna hopi tempo pa miembronan di Parlamento pa prepara nan mes, pasobra nan a haye tempran. A duna nan un luna y mey pa prepara e preguntanan. A stel vast e verslag despues di esaki y awor ta en espera di e contestanan.
Den e siman aki ta spera di haya nan y en berdad tanto den wetgeving overleg, hunto cu Griffie, ta bezig cu Gobierno pa haya e contestanan mas pronto posibel riba e perguntanan di e miembronan di Parlamento. Y si nan drenta e siman aki, otro siman dialuna por cuminsa cu e tratamento di e presupuesto di pais Aruba 2017. Ta spera por haya e contestanan e siman aki. Ningun miembro di Parlamento no por trece padilanti cu nan no ta prepara, pasobra a haya tempo amplio, caminda cu preguntanan por wordo haci a base di e contestanan, cual tin cu drenta. Sin embargo ya tur hende a prepara nan mes cu esaki y mirando tambe cu ta sperando e jaarrekening di 2015, como tambe e presupuesto supletorio cu tin cu trata prome cu fin di aña. Ta hopi na su luga, mirando cu a haya e presupuesto na tempo, trate tambe na tempo. Pesey ta pone tur tempo den e simannan venidero pa focus riba esaki y trata esey. E ta prioridad number 1 di Parlamento pa por rond af e presupuesto di aña 2017.