Un siman despues cu Aruba a tene su Eleccion Parlamentario, caminda pueblo a scoge nos gobernante nan pa e sigiente periode gobernamental.
Parlamento Hubenil di Aruba tambe a tene su eleccion anual, caminda a vota pa su directiva nobo pa e periodo di September 2017 te cu April 2018.
Despues di 3 siman di preparacion intensivo, por a conta cu un atardi bon organisa, yen y cu hopi entusiasmo.
Den presencia di staff, ex-directiva, miembro y futuro miembro nan, e atardi a cuminsa.
Bou guia di e moderador Steve Geerman, a habri e atardi saludando tur presente y cu un momento sagrado pe e Himno Nacional di Aruba. Despues a sigui cu e prome parti di e atardi, cual ta e huramentacion oficial di señorita Natasha Henriquez, cual a sigui e trayectoria necesario pa forma parti di ACHA. E procedura aki a wordo eherce bou guia di ex-presidente Judrick Gario y ex-secretaria Natalie Stokes. Siguientemente a pasa pa e parti di eleccion, caminda tabata tin speech, pregunta y ponencia nan debativo entre tur e candidatonan pa nan respectivo posicion. Despues di e votamento y conteo, e resultadonan tabata lo siguiente:
Presidente: Chloe Ruiz
Vice Presidente: Judrick Gario
Secretaria: Paula Castillo
Tesorero: Marie-Jaindrah Gomez
Vocero: David Quant
A haci tambe un reformacion di tur comision, caminda miembro y futuro miembronan por a scoge den cua comisionnan lo kier forma parti di dje.
E comisionnan cu nan por a scoge di dje ta lo siguiente:
Comision Minister Hubenil
Comision Summer Courses
Comision Eleccion Escolar
Comision Bonding
Comision Relacion Publico
Comision Reglementen
Comision Fundraising
Comision Cas
Despues di esaki a cera e parti oficial y despues a pasa pa e “after party”, caminda e hobennan a disfruta di snack, musica y combersacionnan ameno. Por ultimo, pa pone e cherry riba e bolo, staff a surprise tur hoben presente cu un instructor cu a duna e hobennan les di baile. Parlamento Hubenil Aruba kier felicita e directiva nobo y desea nan lo mihor pa cu e trayectoria nobo aki. E meta principal di e directiva nobo aki ta pa stabilisa e asociasion y halsa e reconocimento di Parlamento Hubenil Aruba den media y pueblo. Pues Aruba, keda pendiente pa locual e hobennan aki lo trece pa nos comunidad.