STRASBURGO- Parlamento Europeo a bay di acuerdo pa pone Hulanda ariba e lista preto di paraiso fiscal, hunto cu Luxemburgo, Malta, Irlanda y Cyprus.
E mocion di Paul Tang (PvdA) pa marca e cinco paisnan Europeo aki como paraiso fiscal a wordo aproba den parlamento Europeo. “Esaki ta un paso historico y e señal mas claro cu Hulanda mester kibra cu pasado”, Tang a bisa.
Door di un planificacion fiscal agresivo di parti di Hulanda, otro paisnan Europeo ta perde di cobra 11.2 biyon na ingresonan fiscal. Esaki ta segun e rapport cu a wordo aproba den parlamento Europeo diamars.
Cambio
Union Europeo tin un lista di paraisonan fiscal, pero esaki ta conta pa solamente paisnan pafo di Union Europeo, na cual Aruba tambe a wordo agrega recientemente.
Parlamento a aproba un raport di un comision special cu aña pasa a investiga n fiscal y evasion di impuesto. Supuestamente lo tin mas di 900 biyon euro perdi debi na e practicanan menciona. un miho cooperacion entre paisnan ta esencial. Tambe e parlamento Europeo kier pa elimina e asina yama ‘visa di oro; cu algun estado miembro ta duna na inversionistanan stranhero a cambio di miles y tin biaha miyones di euro. E falta di transparencia riba e procedencia di e placa ta haci e labamento di placa mucho mas facil.
E yamada pa atende cu paisnan di Union Europeo riba e tema di impuesto fiscal , no ta algo nobo. Na 2017, investigadonan di Universidad di Amsterdam ya caba a pidi esey, ora cu a bin compronde cu Hulanda tabata e parti principal den evasion di impuesto internacional. Di e placa menciona cu a wordo ‘perdi’, 23% lo a pasa via Hulanda. A bisa e ora cu mester haci un distincion entre wafnan di transito manera Hulanda, y e paraisonan fiscal tradicional manera Bermuda y Bahamas.
