Diaranson tabata un dia hopi largo den Parlamento, caminda cu a trata e presupuesto supletorio. Prome Minister, Sra. mr. Evelyn Wever- Croes ta splica mas di e reunion aki.
E tabata un reunion cu tabata al caso, caminda cu ta mira cu e puntonan a wordo treci dilanti, sin cu mester a recuri na ofensanan, na cosnan personal. Esey ta loke Sra. Prome Minister a pidi e ministernan pa demostra esey. A pidinan pa tene nan mes menos personal posibel. Tin algun emocion cu a bay halto, pero en general e reunion a bay hopi bon. E fraccionnan di coalicion, tanto POR, RED y MEP tabata bon prepara. Nan disteracionnan tabata hopi bon y al caso.
Sra. mr. Evelyn Wever- Croes a sigui bisa cu no ta tur pregunta e por a contesta mes ora, manera p.e. ora cu el a wordo sorprendi cu contractnan di huur di ex Minister Presidente cu ainda ta valido. Minister Presidente, Sra. mr. Evelyn Wever- Croes a duna informacionnan cu e tabata tin disponibel na e momentonan ey, pero si el a compromete su mes cu e lo manda e contestanan pa e parlamentarionan.
Gobierno a bin parlamento pa pidi parlamento pa aproba 130 miyon florin cu gobierno di Mike Eman a gasta di mas aña pasa. Ta placa cu a wordo gasta, no tabata tin base pe, no tabata tin aprobacion pe. Ta na e gobierno di MEP pa bin parlamento, pa parlamento aproba e gastonan haci door di e gobierno anterior.
Prome Minister a haci un apelacion na tur 21 parlamentario pa pone Aruba prome. Si no a aproba e deficit adicional di 130 miyon florin aki, Aruba lo haya un problema cu cash flow. Y p.e. AZV no ta wordo paga, y si no paga AZV no wordo paga, no por paga e dokternan, no por paga hospital, no por paga pa manda hende afo. E momento cu un pais no por paga su AZV, ta un momento di crisis.
P’esey el a haci apelacion na tur parlamentario pa aproba e ley aki, cu basicamente ta gastonan haci door di gobierno anterior, pero cu e gobierno actual, ta asumi su responsabilidad.