Un total di ocho miembro nobo Parlamento a haya na momento cu esnan cu ta bay bira Minister a tuma nan retiro for di Parlamento.
Esaki ta nifica cu automaticamente e ochonan cu a sali a wordo reemplasa cu seis candidato di MEP y dos di partido RAIZ. Esnan di MEP cu lo bay drenta Parlamento awo ta:Marco Berlis; Darlene Guedes; Setty Christiaans; Ady Thijsen; Shailiny Tromp Lee
y Alvin Molina. E dosnan di RAIZ ta Misha Raymond y Raymond Kamperveen.
Di e grupo aki cuatro tin experencia caba como Parlamentario mientras cu e dosnan di RAIZ mas Alvin Molina y Marco Berlis lo ta pa prome biaha den e organo aki. Nan a papia di ta hopi transparente y traha pa pueblo di Aruba.
Despues di un introduccion cortico di e Director Interino di Gabinete di Gobernador, a yama tur miembro di Parlamento dilanti un pa un, unda cu den presencia di Gobernador Interino, Su Excelencia Yvonne Laclé-Dirksz nan a huramenta of haci promesa.
E obligacion di e miembronan di Parlamento pa huramenta of haci promesa prome cu acepta nan puesto, ta regla den articulo III.11 di e Constitucion di Aruba.