Piscamento cu harpun ta un tematica cu semper a trece controversia, pero cu a tuma forsa den e temponan di pandemia cu nos ta bibando actualmente.
No ta un secreto mas cu tin un guera friu entre Ministernan Lopez-Tromp, Bikker y Romero pa loke ta trata e maneho di “spearfishing” na Aruba. Mientrastanto Ministernan Chris Romero y Andin Bikker ta keda para tras di un gedoogbeleid pa piscamento cu harpun, Minister Lopez-Tromp a sa di mantene un postura contra esaki argumentando un cantidad di consecuencia politico cu esaki lo por trece pa Pais Aruba.
Pero e realidad actual ta cu nos pueblo ta cremenchando y e Coronacrisis a duna nos un sla hopi duro pa nos wanta ariba pia. No ta momento pa pensa riba e posicion politico di un pais, pero mas tanto ta ora pa pone e urgencia di e ser humano como prioridad. Nos piscadornan tin derecho y nan trabou mester wordo recoci, pero riba tur cos nos sistema politico mester tene compasion di esnan mas vulnerabel y pone nan bienestar na prome lugar.
Ayera por a mira un Parlamento y 2 Minister decidido na no warda mas pa duna e piscador su derecho. Y mientras Minister Lopez-Tromp a keda vocifera su desacuerdo pa bin cu un gedoogbeleid pa piscamento cu harpun, su argumentacion practicamente a bay den bashi pasobra Parlamento a dicidi otro. Via 2 mocion, cual 1 di nan a keda aproba unanimamente, Parlamento a desaproba Minister Marisol Lopez-Tromp su postura pa cu spearfishing. Dunando 10 dia di tempo, Parlamento di Aruba a instrui e 3 Minister involucra den e maneho di spearfishing pa bin cu un gedoogbeleid cu lo tolera e piscamento cu harpun, bou di algun regulacion.
Un anochi di victoria pa e piscadornan, uno cu sigur no a laga un bon sabor di boca serca Minister Lopez-Tromp cu a practicamente nenga tur e tempo aki di duna e “spearfishers” un solucion y alivio inmediato.