Parlamentario Vrolijk: Mike Eman ta un fracaso total: Situacion social den e pais aki tabata den situacion critico hamas bisto bao di su regimen

Mi a abstene di reacciona riba politiconan negativo y sigur esunnan cu a causa e pais aki hopi daño y cu awo nos hunto cu pueblo tin di paga e prijs di mal gobernacion, engaño y mal maneho financiero. Riba hopi peticion mi a dicidi di dedica y perde tempo balioso na recorda pueblo ken ta Mike Eman y su gang y sali di mi rutina di por caba di contesta Raad van Advies riba dos ley importante pa integridad den e pais aki y tambe pa locual ta e ley di e Lotto nobo.

Vision berde
Mike Eman a priminti pueblo cu e lo kita BBO mane cu e drenta gobierno pasobra su vision Berde lo percura pa por tin un pilar economico nobo unda lo crea cupo di trabao pa 1600 hende y cu na 2020 pues aki par di luna nos lo ta 100% riba energia alternativa. Pero nos tur riba e pais aki sa cu esaki tabata e engaño di mas grandi. No a crea ni un cupo di trabao pero mas bien a percura pa amigonan cercano entre nan Richard Arends pa por a probecha di esaki y saca miyones di nos NV’snan, den Green Conference y Europe Meets the Americas sin conta su rol den RDA. Banda di esaki a masacra placa di WEB, Utilities y Elmar den pagamento miyonario na oradornan manera Richard Branson, Al Gore y sin conta e biahenan di Wubbo Ockels cu a conduci cu nos companianan estatal tabata practicamente den cora. Y resultado ta cu ni 20% di nos energia ta energia alternativo y realidad ta cu mayoria ta bin di molinanan di biento di Vader Piet construi bao Gabinete Nelson Oduber IV.
Amigonan y sponsernan a masacra nos NV’snan sin lubida e fracaso total di e proyecto di gas pa WEB cu Ecogas cu a laga WEB den problemanan financiero grandi. Y asina por sigui ilustra abuso cu a causa cu pueblo mester paga y sin lubida cu bao Gabinete Mike Eman prijs di coriente a subi cu mas di 35% enbes di a baha manera a promete pueblo cu su vision berde lo haci pa pueblo.

Orguyoso di a crea debe
Ta Mike Eman so tabata orguyoso di a endeuda e pais aki, unda cu su persona pa cobarde ora resultado a drenta na 2017 a core entrega su puesto como lider, pero na final presion di sponsernan y muestra di debilidad mester a asumi e liderasgo di un partido cu a destrui un pais cu nos tin di traha duro pa 2039 nos por tin un finansas sostenibel manera a ser laga atras na 2009. Pues lo dura 30 aña pa nos por sali di debenan crea den 8 aña. Awo Mike Eman kier hunga di salbador, awo kier hunga di kens y kier duna tur hende culpa cu awendia tur cos a bira asina caro y cu e homber y muher chikito ta pasando momentonan dificil. Dicon Mike no a corda riba nan ora el a bay den dos magno proyecto PPP cu awo nos ta pagando 60 miyon florin y otro aña mester paga 20 miyon mas y lo yega na 80.7 miyon cu nos tin di paga pa 25 aña. Awo Mike kier sigui malusa hende den dificultad pa algo cu e mes a crea ora cu el a entrega waf di Barcadera y cu por haci y deshaci cu prijsnan riba container. Situacion social den e pais aki tabata den situacion critico hamas bisto bao Gabinete Eman cu a sigui corta den tur instancia social pa por a sigui duna entre otro prensanan comprometi miyones di esaki pa asina e por haya cobertura manera un dictador ta haci. Nos por sigui cu un lista largo di desastre cu sr Mike a haci sin cu por a percura pa stabilidad economico, financiero y social den e pais aki.
Mike Eman a traiciona su pueblo
Banda di a core tuma retiro Mike Eman a laga su sostenedornan na caya ora cu e no a bay Parlamento pa por defende su maneho pero a prefera di cobra overbruggingstoelage y bay sinta dushi den su Penthouse y laga pueblo paga pa tur desaster cu el a causa. Na 2014 Mike Eman a haci un drama y a laga nos cara na berguensa unda nan a yama un promer minister un bipolair tienermeisje pasobra ta e mes a firma e acuerdo y cu na final Hulanda a pone nos bao supervision financiero cu te dia di awe nos ta paga pa su eror di a endeuda e pais aki sin misericordia.

Pa termina mi ta haya lamentabel di por a perde poco tempo pa recorda pueblo cu nos ta aki no pa via di e Gobierno aki pero door di un super mal maneho financiero di Mike Eman y henter su gabinete y sigur su parlamentarionan cu nunca a para pa pueblo pero pa nan mesun beneficionan personal y comercial. Y sigur ta bon pa Mike Eman duna pueblo cuenta ta con bo por biba den un penthouse, drumi den airco henter dia, come shrimps, lobster y steak di mas caro y keto bay ta sin trabao , mientras abo homber y muher chikito tin di traha pa paga un debe crea y cu nos lo yega te na 2039 un biaha mas na un maneho financiero sostenibel.

Comments

comments