Parlamentario Tevreden ta hopi satisfecho di por a tuma nota cu e fecha a yega pa cambia e directiva di Lotto pa Deporte. Pa esaki ta felicita minister Endy Croes y deseasu persona sabiduria pa cu instalacion di un directiva nobo. Pa e ultimo tres añanan cu a pasa tawata hopi dificil pa e minister anterior ricibi cooperacion di e directiva di Lotto, masha poco Lotto a atene su mes na desaroya nos veldnan di entre otro futbol rond Aruba. Y sigur ta un alivio cu a yega momento pa eligi un directiva nobo pa e fundacion aki.
Ayera den oranan di atardi Minister Endy Croes encarga cu deporte a anuncia cu e a reuni cu e directiva di Lotto pa Deporte y a anuncia cu lo percura pa nombra un directiva nobo pa Lotto di un total di cinco persona. Un noticia sigur positivo mirando e intrankilidad cu e bestuur aki a percura pe, tur e añanan tras di lomba. Un directiva cu a secuestra e fondonan di Lotto y a trece inbalance den e mundo deportivo. Ta di spera cu e directiva nobo lo ta prepara y ekipa pa por brinda deporte en general cu apoyo y cooperacion unda ta mas necesario.
Pa Tevreden esaki ta nifica cu e oportunidad cu Centro di Bario y Deporte Dakota lo mira turf por bira algo posibel den e tempo nos dilanti. Centro di Bario y Deporte Dakota ta un di e clubnan cu mas tanto mucha tin cu ta hasi uso di e tereno pa practica futbol. Di teamnan baby te pa division di honor, dunando asina tur edad e oportunidad pa practica deporte y asina mantene nos hobenannan for di mal caminda. Tambe Dakota ta un di e clubnan cu mas aña di existencia na Aruba mirando cu a caba di celebra 74 aña di existencia algun luna atras.
Cu si minister Croes di deporte cumpli cu Centro di Bario y Deporte Dakota pa drecha e tereno cu turf, esta yerba artificial, pa asina nos muchanan por sigi practica e deporte di futbol, e lo ta un muestra di aprecio grandi na tur miembro, hungador, habitantenan y simpatisadornan di S.V. y e bario Dakota den gran forma. Nos ta spera di por experiencia e cooperacion aki y cu esaki no lo keda na solamente un soño, segun Parlamentario Tevreden.
Finalisando Tevreden ta desea hopi exito na e directiva nobo di Lotto pa Deporte cu e reto nan dilanti. Encurashandonan pa ta transparente, responsabel y dedica na e trabou cu a ser encomenda na nan. Pa nan trata mas tanto posibel pa evita di ripiti e fayonan cu a mira den e directiva anterior y cu nan lo traha duro pa logra metanan grandi pa deporte di Aruba en general.
