Den medionan di comunicacion nos a tuma nota di atakenan frontal contra di DIMP como organisacion, contea e directora y tambe e profesionalnan cu ta forma parti di e organisacion. E atakenan aki ta bin di sr. de Meza, su simpatizantenan, pero tambe di parti di candidato y parlamentarionan di partido AVP.
Minister Wever ta sostene DIMP
Riba e pagina social di Minister Wever nos por a tuma nota cu ayera el a publica cu su persona den rol di Minister a reuni cu e directora di DIMP. Na final di e reunion el a indica claramente cu e ta considera DIMP un organisacion profesional cu empleadonan publico capas y determina pa eherce nan trabou cu honor y consenshi, manera debe ser. Minister Wever a lag’e ta duidelijk cu e ta confia plenamente den DIMP su profesionalismo!
Minister Wever cu otro pensamento cu partido AVP?
E publicacion aki mas cu claro ta hiba nos na e conclusion cu Minister Wever en berdad no ta di acuerdo cu su partner den coalicion y nan acusacionnan contra DIMP. Sinembargo, ningun momento partido Futuro, pues ni Minister Geoffrey Wever y tampoco Minister Gerlien Croes a sali y defende DIMP. Pues, pa aclarea e asunto awe nos a manda preguntanan adicional na Minister Wever pa loke ta trata e asunto grave aki di ataca un organisacion y nos profesionalnan di e forma cu AVP a bin ta haci.
5 pregunta adicional
E preguntanan adicional ta referi na e post di Minister Wever. Nos a puntr’e directamente si e ta distancia su mes di e atakenan y ponencianan di sr. de Meza, parlamentarionan di partido AVP y otro candidato y sostenedornan di AVP. Alabes nos a puntr’e si e mes ta confia den e trabou di DIMP unda cu ta trata di un proceso di screening integro, caminda tur persona ta haci nan trabou manera ley ta indica.
Nos ta spera di por ricibi e contestanan riba nos pregunta mas liher posibel, pa asina por trece claridad riba e situacion grave aki. Esaki sigur ta crea descordia, desconfiansa y no ta contribui en lo absoluto na un gobierno stabil y mucho menos na bon gobernacion!
