Atrobe tin drama den Reino y atrobe e autor di e drama aki ta Minister Eman di Aruba. Na 2014 tabata su welga di hamber y awor na 2016 ta su postura sin weso di lomba rond e nombracion di e Gobernador nobo pa nos Pais. Minister Eman y AVP awor kier tira culpa riba tur hende menos realisa cu ta e propio Minister Eman su actonan ta haci cu awe Hulanda no ta respeta e Pueblo di Aruba.
Eman nunca a defende interes di Aruba
Minister Eman nunca a defende interes di Aruba na Hulanda. Cada ves e mandatario ta bay Hulanda pa negosha y entrega Aruba su Status Aparte na pida pida bek. Ainda nos por corda con e difunto politico Wiels a yama Minister Eman pa Mike de makelaar, splicando cu Minister Eman ta un bendedo di Aruba cu cada ves cu e bin bek di Hulanda ta bin cu un sneechi di Status Aparte kita. Esaki tabata bisto ora cu a haci cambio di Statuut, Minister Eman a lucha pa Hulanda haya un poder nobo den articulo 27 di Statuut cu cual Hulanda por traha ley pa Aruba mas liher segun su necesidad y prioridad. Banda di esaki Minister Eman mes a firma tur clase di protocol cu a resulta caba den entrega di autonomia den forma di supervision financiero di CFT y di cual ainda falta mas ehecucion di entrega di autonomia. Pa no lubida con Minister Eman a laga Aruba atras sin guia di un Minister President pa bay hunga e rol di loopjongen pa Reino biahando rond di mundo pa lucha pa Hulanda por haya un stoel den e Conseho di Siguridad di Nacionnan Uni, sin por mustra ki beneficio esaki lo tin pa Aruba. Esaki ta djies algun ehempel conoci cu ta mustra bon cla cu Minister Eman nunca a defende e interes di Aruba, semper el a para na banda di Hulanda. Pesey awe cu Hulanda a bira wals riba Minister Eman y no ta respeta e Pueblo di Aruba, ta pasobra cu Minister Eman mes a duna Hulanda tur oportunidad pa haci esaki.
A crea megadebe y haci Aruba vulnerabel
Pa falta di weso di lomba y cu e postura di no wak propio fayonan pero tira culpa riba tur otro hende, awe Minister Eman ta pone cu Hulanda por haci deshaci cu Aruba. Banda di esaki e MEGADEBE cu Minister Eman a crea riba lomba di e Pueblo aki ta pone cu Aruba ta den un pocision hopi vulnerabel. Nos ta caba como Pais autonomo bou curatela di Hulanda cu e supervision financiero di CFT y den e posicion aki Hulanda tin espacio pa haci deshaci facilmente. Ta Minister Eman mes a pone Aruba na rudia cu e MEGADEBE aki y for di e posicion ey Hulanda por pasa wals riba bo hopi mas facil.
Respet lo yega bek ora Pueblo rechasa Eman
Awe e Pueblo di Aruba ta obliga pa guli manda abou cu e Gobierno di AVP y Minister Eman no por a produci un candidato cu ta cumpli cu e rekisitonan pa wordo nombra pa Hulanda como Gobernador nobo di Aruba. Na luga di esaki Hulanda a pasa wals riba Minister Eman y nombra sr Boekhoudt contra tur procedura cu nos ta custumbra cune. Algo asina a bira posibel debi na e hecho cu Minister Eman nunca a defende interes di Aruba y cu su maneho a trece Aruba den un situacion vulnerabel na unda cu Hulanda ta haya tur chens di falta respet na e Pueblo di Aruba. E respet pa nos Pais y Pueblo lo yega bek ora cu Pueblo rechasa e maneho di Minister Eman y kita tur e poder cu nan a confia e Gobierno di AVP cune. Tanten cu Minister Eman keda na mando, e mes lo haci cu Hulanda no lo respeta e Pueblo di Aruba.