For di hopi tempo nos ta bin ta cuestiona e debe cu Minister Eman y su Gabinete ta trahando riba cabes di e Pueblo aki y specialmente e hobennan cu aki poco tempo lo mester carga cu e peso di un debe nacional for di tur proporcion. Na e momentonan aki di cada un florin ya caba 83 cent ta bay pa cubri debe y esaki ta pone cu no ta resta espacio pa por cumpli cu gastonan necesario di enseñansa, salubridad y pa combati criminalidad. Den un situacion asina aki e Pueblo ta sufri, ya cu Gobierno ta cuminsa corta formalmente den su subsidio, ta corta den servicio, ta corta den beneficio, ta hisa belasting, ta cuminsa cobra belasting na un manera adelanta y un tras di otro, cu e consecuencia cu e costo di bida na nos Pais ta bira carisimo y e Pueblo ta bira pober. Pero e no ta keda na pobresa so. Pobresa ta trece criminalidad cune ya cu e costo di bida halto ta pone cu un grupo di persona ta busca manera di sobrevivi door di recuri na hortamento y atraco. Ta esey ta locual un MEGADEBE ta haci cu un Pais. E MEGADEBE cu Minister Eman a traha riba nos cabes no ta trece progreso, e ta trece pobresa y criminalidad creciente. Awe lastimamente nos Pais ta cosechando e fruta di e MEGADEBE di Minister Eman, na unda cu tur dia tin casonan di ladronicia y atraco arma. Pueblo ta biba den medio danki na e mal maneho di Minister Eman cu su Ministernan cu a gasta placa pa loco, crea un MEGADEBE, trece pobresa y criminalidad creciente hunto cun’e. Pa nos por biba un bida digno na e Pais aki, Pueblo mester rechasa e maneho di Minister Eman y kita e poder cu e mayoria a duna nan. Pasobra tanten cu Minister Eman keda na poder, e lo sigui crece e MEGADEBE y e pobresa y criminalidad creciente lo keda castiga e Pueblo aki.