Durante tratamento di Presupuesto 2017 nos a dedica tempo na ilustra kico te awor aki ta e saldo di e mal maneho di Minister Eman y su banda. Aruba na man di Gabinete Eman ya no ta mescos mas. Minister Eman a destrui nos Pais riba diferente frontera. Nos autonomia, nos florin, nos naturalesa, nos identidad y nos trankilidad, tur a wordo destrui na man di Eman y den un serie di 4 articulo nos lo amplia riba e destruccion haci. Den e articulo aki nos ta amplia riba e destruccion di nos trankilidad.
A destrui nos trankilidad
E MEGADEBE di Minister Eman no a trece desaroyo, el a trece pobresa creciente y cune criminalidad a hisa cabes. Aruba tin miedo! Atraco tur dia. Atraco violento. Atraco contra cuidadano, comerciante y nos grandinan. Atraco den dia, merdia, anochi. Atraco hasta na Oficina di Gobierno. Tur esaki ta pasa y Minister Eman ta biaha keto bay y laga Minister Dowers atras sin fondo suficiente pa combati criminalidad. Nos famianan tampoco no tin trankilidad. Tin hopi problema social. Pero nos Minister encarga cu famia ta blo biaha pa Canada y nos Minister Social y di Labor ta mas preocupa ki deal personal e por saca for di e Citgo deal, siendo cu insiguridad laboral ta caba cu e trahado su trankilidad. Ta esaki ta e realidad amargo na nos Pais cu ta destrui nos trankilidad.
Den gobernacion tampoco tin trankilidad
Minister Eman no ta lidera y e Ministernan di su Gabinete a bira usa e vacuum na liderato pa nan abusa. Minister De Meza no ta ‘worry at all’ cu nos economia cu ta nul komma nul. E ta blo percura pa su negoshinan por haya deal via stroman den Citgo deal. E no ta worry mes cu medio ambiente y ta laga trabou con cu ta wordo haci cu asbest na e tereno di e refineria y ta laga e vecindario di Parkietenbos stik den e huma di e dump y e negoshi pa kima sushi. Minister Schwengle ta laga salubridad pa su cuenta. Tin hopi keho pero nada di atende cu e hendenan aki. Ta percura si pa nombra hende clave rond di ex Minister Visser den posicionnan clave pa por yuda nan mañan. Y riba dje e mandatario ta traha parttime como dokter, siendo cu dr. Kelly di MEP si mester a bandona politica pa e persecucion politico di Eman. Minister Dowers hopi arogante pa no a move un dede y laga Ministernan tene man cu hende dudoso y criminal. Eman cu Kiko Gomez, Otmar cu Ospino Strawberry, De Meza cu Rincon y Sevinger cu permiso pa hende riba lista di CIA. Y pa colmo bou di e Minister su nanishi tin trafico di hende ta tuma luga den cual nos no ta duda cu lo tin hasta Minister di Gabinete Eman envolvi. Minister Michelle a haci puro show y biahe pa Canada percurando kizas pa por score un of otro deal den enseñansa mescos cu nos por a ripara den e caso di seguro nobo pa studiante na Hulanda.
Pueblo mester rechasa e destruccion aki
Nos no a caba aki. Tin mas Minister pa expone y den e sigiente articulo nos lo amplia riba nan. Un cos si, nos no por sigui asina. Pueblo mester rechasa e destruccion cu Minister Eman y su bende a haci na nos Pais. No cay pa promesa falso, e realidad di su destruccion na nos Pais ta bisto y e ta den nos man pa para e destruccion aki di nos dushi Aruba.