E siman aki a habri cu un welga di e trahadonan di Serlimar a raiz di e incertidumbre cu nan ta aden. Pa 7 aña largo Minister Eman no a bin cu ningun plan pa e dump di Parkietenbos y awor den porta di fin di aña e Gobierno aki kier djis cera e dump, manda tur sushi mas pariba, laga Serlimar pa su cuenta sin ingreso for di e weegbrug di dump y e empleadonan den incertidumbre pa nan pan di cada dia. Tur esaki sin presenta un solucion structural pa e problematica di e dump. Ata aki un otro prueba mas di e mala fe cu Minister Eman ta gobernando nos Pais cune.
No tin solucion structural
Na momento cu Minister Eman a yega na mando na nos Pais, tabata tin un solucion den implementacion na e dump na Parkietenbos cu a pone cu e candela a paga y cu e volumen di sushi lo wordo reduci den fluff. E solucion aki a wordo sabotea y boicotia pa Minister Eman y su bende na unda cu tabata bisto cu e solucion mester a bin for di man di un sponsor poderoso di su partido. Dicho hecho, Minister Eman a tene tur hende 7 aña na liña pa despues sali indica den e dianan aki cu su solucion ta pa tur sushi di dump wordo entrega gratis na e compania priva di procesa sushi. Un plan structural pa e problematica na dump mes, Minister Eman no a presenta.
Crea intrankilidad
E decicion aki di Minister Eman claramente a crea intrankilidad. Pasobra si e sushi ta wordo entrega gratis otro caminda, Serlimar lo perde ingreso substancial cu lo pone e pan di e trahadornan na peliger. Y como cu Minister Eman na ningun momento a presenta un plan integral cu detaye di kico lo bay pasa cu e dump na Parkietenbos, e trahadonan a pone trabou abou y sali busca nan derecho cu tur nan rason.
Eman ta trapa riba tur cos
E ta di lamenta cu Minister Eman ta goberna cu asina hopi mala fe. Pasobra si tabata otro, e no lo a laga e trahadonan y e vecindario di Parkietenbos den un incertidumbre pa 7 aña largo. Tampoco e lo a bin cu un plan den cual e ta busca pa beneficia un solo Arubiano poderoso, neglishando e centenares di otro Arubianonan trahando na Serlimar. Pero Eman pa awor a mustra di ta trapa riba ley, Constitucion y hasta hende pa e por cumpli cu capricho y cu sponsor di su partido. Eman ta dispuesto pa trapa riba tur cos, tanten cu e keda bon y na poder.
Keda alerto
Aunke cu Gobierno a bin cu un decreto den cual nan ta bisa cu tur empleado di Serlimar lo keda cu nan trabou y beneficio, ta bon pa e sindicato y trahadonan keda alerta. Esaki ta conta pa e vecindario tambe di Parkietenbos, ya cu tira sushi mas pariba no ta solucion si e holo cu ta sali di eynan ta insoportabel. Ademas te ainda Minister Eman y su bende no a bisa nada ta con lo sanea e dump na Parkietenbos. Ainda ta reina hopi incertidumbre y como cu Minister Eman ta conoci pa ta gaña, ta necesario pa tur hende keda alerta.