No tin crisis financiero mundial pero e finansas publico di nos Pais si ta den crisis. E motibo pa awo ta conoci. Minister Eman a traha un MEGADEBE y a uza e placa na consumo pa yuda un grupo di hende priviligia y menos di 1% di tur e placa a bay den inversion na bienestar di e Pueblo en general. Banda di esaki Minister Eman largo bay no ta papia e berdad riba e situacion real di nos finansas publico cu e consecuencia cu na su man Aruba a bay bou di curatela di Hulanda den forma di e supervision financiero di CFT. Tur esaki ta pone cu e confiansa ta bay perdi na nos Pais y esaki ta pone cu nos economia ta tranca formalmente. Pa nos economia bolbe florece ta necesario pa e confiansa bin bek cerca Pueblo y inversionista y esey nos lo haya solamente ora cu tin bon gobernacion. Pa logra esaki Pueblo mester rechasa y e kita tur e poder cu nan a duna na Minister Eman riba nos Pais. Mas tempo Minister Eman keda, ta mas mal gobernacion lo tin y mas nos Pueblo lo sufri na man di un economia stanca.
Gobernacion mester ta serio y integro
Nos mester realisa cu un inversionista serio ta keda lew ora nan ta mira cu no tin seriedad den gobernacion. Banda di esaki un inversionista serio no lo kier inverti den un Pais na unda cu e integridad di su mandatarionan ta cuestionabel. Cu awe economia ta tranca ta pasobra inversionista tambe ta wak ora cu Minister Bermudez ta splica riba un reforma cu Gobierno ta bay introduci anto pa su mañan Minister Eman ta bin papia full un otro idioma. Inversionista tambe ta keda leu ora e mira e corupcion cu ta tumando luga cu tereno na Aruba na unda cu Minister Sevinger ta priviligia un solo famia cu mas di 90.000 meter cuadra di tereno comercial. Un inversionista serio tambe ta realisa cu nan no por deal cu un Gobierno na unda cu bo ta haya un Minister Oduber ta bay entrega carta di retiro cerca Gobernador culpando su coleganan di mal gobernacion y bisando cu Minister Eman no ta lidera, pa despues haya lollipop y haci manera nada no a pasa. Y un inversionista serio lo keda leu ora cu e mira con Minister Eman ta tene man cu hendenan manera Kiko Gomez y Minister Otmar cu Ospino Span.
Criminalidad tambe ta core cu inversion
Y mas cu claro, un inversionista serio no por confia un Gobierno cu ta laga criminalidad haci deshaci na e Pais aki. Pasobra tristo ta cu un inversionista serio tambe ta realisa cu e mal maneho di Gabinete Eman di crea un MEGADEBE asina disproporcional ta trece pobresa cune cu ta incentiva criminalidad cu despues e mesun inversionista ta bira victima di dje. Y si banda di esaki e mira un Minister Dowers cu enbes cu e actua cu man duro, kier haci infantil door di culpa tur hende pa e criminalidad creciente sin mira kico e mes ta participe na dje, anto e decicion di keda leu di inverti den nos economia ta wordo tuma mesora.
No pone confiansa den hende robes
Economia di bo Pais ta lora ora cu tin e confiansa di bon gobernacion, pesey e ta keda na Pueblo pa no deposita nan confiansa den hende robes cu dia aden, dia afor ta demostra di no ta tuma gobernacion na serio y banda di esaki no ta gosa tampoco di e intergridad necesario pa por hiba un bon gobernacion na nos Pais.