Segun Parlamentario mr. Juan Ady Thijsen no ta asina cu ministernan por actua free for all. Tarea di gobernantenan ta regla den nos constitucion: ‘E país ta ser goberna pa un conseho di minister encabesa pa un Prome minister. Cada minister ta dedica su mes na un parti specífico di e gobierno y ta hefe político di su propio ministerio. Prome cu nan tuma nan encargo ministernan ta huramenta dilanti gobernado cu ni directo ni indirectamente nan lo duna of cumpli cu promesanan na algun persona , sea quien sea cu e ta, y ta huramenta tambe di no ricibi regalo ni directo ni indirecto. Segun Parlamentario mr. Juan Ady Thijsen ora un minister faya cu eror grave manera den caso di ser acusa di faborece un persona of compania violando tur principionan di bon gobernacion y su huramentacion dilante gobernador den un democracia bibo Parlamento tin e poder di pidi e minister rindi cuenta na Parlamento y si Parlamento haya cu e minister a faya Parlamento por tuma un mocion di desconfianza pa baha e minister. Actualmente e democracia na Aruba den e sentido aki ta morto segun Parlamentario mr. Juan Ady Thijsen ya cu e Parlamento mayoritario actual no ta haci su trabao debido y ta acepta sin mas tur mal actuacion di ministernan. Sinembargo den e reunion publico di 5 di September Fraccion di MEP a bin cu pruebanan hopi pisa contra minister Sevinger. minister Sevinger ta ser acusa di a faborece un persona y su compania contra tur reglanan na unda personal pa cual minister Sevinger ta responsabel pa el a practica proceduranan inaceptabel den cualkier bon gobernacion. Fraccion di AVP tambe a pidi minister Sevinger pa defende su mes riba e acusacionan serio aki. Un otro caminda cu segun Parlamentario mr. Juan Ady Parlamentario nos constitucion y leynan a introduci manera pa frena free for all dor di ministernan ta e e caminda di castigo penal. Den cuadra di esaki Parlamentario mr. Juan Ady Thijsen tin entendi cu tin ciudadanonan a acudi na Ministerio Publico cu documentonan contra minister Sevinger. Segun Parlamentario mr. Juan Ady Thijsen pueblo ta pendiente con e reunion lo sigui y wak kico lo sucede cu e acusacionan grave presenta contra minister Sevinger pa mira con bibo nos democracia na Aruba ta. Segun Parlamentario mr. Juan Ady Thijsen Fundacion Mito Croes por traha mil rapport pa Mike Eman pero esaki ta cosnan esencial cu mester drecha riba nos pais.