Aruba henter y tambe den Reino Hulandes tur hende por a sigui e asunto di nombracion di un gobernador pa Aruba. Na final di cuenta Alfonso Boekhoudt ta nos siguiente gobernador. Sinembargo full e actitud di Mike Eman den esaki segun parlamentario mr. Juan Ady Thijsen tabata uno bochornoso. For di comienso Mike Eman a para riba e candidatura di Angel Bermudez y a sigui persisti aunke Mike Eman tabata sa cu Hulanda ta contra e candidatura di Bermudez. Mike Eman ta menciona e acuerdo di procedura di 2001/2002 pero ta evita di bisa cu segun e acuerdo aki mester tin draagvlak pa e candidato locual no tabata e caso. No tabata tin draagvlak pa Bermudez. Hulanda tin problema cu edad di Bermudez cu ta hopi halto. Bermudez di su banda a priminti cu e por bay full e 6 aña. AVP ta lubida cu Hulanda tambe tin contract cu Bermudez a firma cu Ministro Yrausquin como consehero na unda ta poni cu Bermudez no ta traha full time. E pregunta cu ta keda den aire ta si Hulanda a tene cuenta cu e caso di Interbank. Finalmente Mike Eman a viaha te Hulanda pa scucha personalmente cu no ta bin ningun cambio y cu Alfonso Boekhoudt ta keda nombra como nos siguiente gobernador. Pio ainda segun parlamentario mr. Juan Ady Thijsen Plasterk ta pone Mike Eman firma un declaracion pa recorda Mike Eman cu ainda Aruba y Hulanda tin trabao pa caba specialmente den interes di Hulanda. Esey nos por conclui pasobra Mike Eman ta cumpliendo cu Hulanda unda hasta den presupuesto di Aruba di 2017 interesnan di Hulanda ta ancla manera Gasunie, Antony Veder, LNG project etc, mientras te awe Mike Eman ta wardando riba un prestamo cu interes abao pa baha obligacionnan di Aruba castiga door di Hulanda pa e hecho cu gobierno di AVP no a pone ordo den finansas di Aruba manera palabra cu Hulanda. E mal liderasgo di Mike Eman ta bay a costo di Aruba y segun parlamentario mr. Juan Ady Thijsen Aruba no por sigui asina y merece miho.