Lider di fraccion di MAS, sra. drs. Marisol Tromp, a presenta un serie di pregunta na Parlamento di Aruba, dirigi n’e Minister di Finansa y Cultura, mr. Xiomara Maduro. Den un carta oficial manda n’e presidente di Parlamento, mr. Edgard Vrolijk. Tromp ta busca aclariacion riba e situacion actual di e cuentanan anual financiero di e pais.
Tromp ta subraya e importancia di e responsabilidad, transparencia y integridad gubernamental. Segun Tromp, Gobierno mester entrega anualmente e cuentanan financiero di e pais na Parlamento. Sinembargo, for di Gabinete Wever-Croes, esaki no a sosode. E ultimo cuenta anual financiero presenta tabata coresponde na aña 2018, CUA (Comerciantenan Uni Aruba) tambe esaki dilanti den un rueda di prensa cu a tuma luga recientemente.
Pregunta clave n’e minister di finansa y cultura
A continuacion, Tromp ta haci e siguiente preguntanan:
1. Na final di 2023 Minister di Finansa sra, Xiomara Maduro a indica cu e jaarrrekeningen 2019 te cu 2023 lo ta kedando cla, y cu nan lo wordo entrega den FASE na Staten den e periodo di februari te cu october 2024. Ya casi mita aña di 2024 t’ey pasa y Parlamento di Aruba no a ricibi ni jaarrekening 2019. Kico ta e motibo pa e tardansa y con a para cu e palabracion aki?
2. Minister di Finansa ta capas pa dirigi su departamento di Finansa? E director di departamento Finansa por cumpli cu e palabracion haci?
3. Minister y tambe director di departamento di Finansa a yega di informa cu nan lo ta reorganisando e departamento di Finansa pa hacie mas eficiente y cu nan ta trahando na e palabracionnan den landspakket. Den cuadro di esaki, cua posicion lo wordo crea y cua posicion lo wordo elimina?
4. Con esaki lo fit den e supervision financiero den forma di Rijkswet cu lo bay wordo firma awo atrobe?
5. Ken su tarea e ta pa produci e jaarrekeningen di Pais Aruba y dicon cada bes aparentemente tin contratiempo?
En busca di contesta por escrito
Tromp a pidi contesta riba su preguntanan wordo proporciona por escrito, enfatisando e necesidad di claridad y responsabilidad di parti di Gobierno. E carta ta refleha e preocupacion creciente p’e falta di transparencia y e maneho financiero di e actual gabinete.
E comunidad di Aruba ta spera cu interes e contesta di e Minister di Finansa y Cultura, p’e duna claridad riba e situacion financiero di e pais y e eficacia di e maneho gubernamental den e maneho di nan responsabilidadnan financiero.