Segun Parlamentario Jennifer Arends-Reyes, despues di un tempo basta largo, e proceso ta canando pa Aruba conoce un ley cu lo yuda structura centronan di cuido di mucha. E la tuma su tempo y por bisa cu te ainda ta den dialogo cu diferente stakeholder riba diferente aspecto cu a ser presenta den e concepto di ley. Recientemente Parlamento a ricibi e nota cu ta contene e contestacionnan riba e preguntanan cu a haci na e Minister concerni cu e ley di centro di cuido di mucha. Locual ta algo notable ta cu ta fraccion di AVP so a manda pregunta riba e concepto di ley aki cu lo ta na beneficio di nos muchanan. E ley aki lo mester logra mas structura pa e centronan di cuido aki, caminda cu lo tin un registro di centronan, lo tin un inspector encarga cu e centronan aki y lo mester tin bista riba e aspectonan di entro otro siguridad y training pa e leidsternan. Tambe lo tin un periodo di transicion pa e centronan aki por cumpli cu e rekisitonan y por tin nan papelnan na ordo. Na final di dia e esencia di e ley aki ta pa asina tin un miho bista riba locual Aruba ta ofrece como cuido na nos ciudadanonan di mas chikito y pa asina purba evita casonan lamentabel door di mehora e parti di informacion, training, siguridad y control. Durante un reunion di comision di Enseñansa hunto cu algun propietario di centro, a trece dilanti cu e ta keda un negoshi y cada centro ta ofrece un pakete. Ta keda na cada mayor pa evalua bon cual ta cumbini nan mas y ta ofrece locual cu nan ta buscando. Lo keda existi un variedad di prijs y servicio pero cu e aspecto cu tur e centronan ta registra y cu lo conoce un structura di locual ta regarda e rekisitonan basico pa por traha cu mucha.