Parlamentario Jeffrey Kelly a para keto un rato riba e aspecto laboral y kico Citgo ta nifica pa nos hobennan. Fraccion di AVP a entrega varios mocion y tres di nan por bisa sigur, ta caminda cu ta pidi Gobierno pa duna preferencia di trabao na ex trahadonan di Valero y muy specificamente nos hobennan. Tambe Fraccion di AVP, a base di mocionnan a pidi pa duna cursonan intensivo cu ta dirigi riba ampliacion di conocemento y habilidad di hobennan cu ta interesa pa traha den e refineria y tambe a pidi Gobierno pa introduci un scol di aprendisahe cu lo yuda prepara nos hobennan.
Por a tuma nota cu conseho di minister a base di un decreto ministerial a forma un comision y e comision aki lo ta encarga pa crea un scol tecnico den cooperacion cu Citgo. Lo keda pendiente pa mas detaye rond di e asunto aki pa despues haya mas informacion pa loke ta trata e preparacionnan pa e formamento di e comision. Ta contento di mira cu Gobierno ta cumpli cu mocionnan di Parlamento pasobra esaki sin duda ta contribui na e formacion di e proximo generacion di Arubianonan cu lo bay traha den e refineria, segun Kelly.
Pa loke ta trata e comision, tin di compronde cu esaki ta wordo libera pa director di Refineria di Aruba, sr. Alvin Koolman, hunto cu asistencia di sr. Philip de Sousa, mirando cu nan ta expertonan den e area aki, basa riba nan conocemento y experiencia den e industria. Segun por a compronde nan lo tin e tarea di den un termino di dos luna presenta un proposicion na Gobierno pa loke ta trata e formacion di un scol tecnico cu focus riba e trabao den e refineria.
AVP ta contento di scucha cu esaki lo tin un focus riba e studiantenan di EPI, sector tecnico, EPB sector tecnico y tambe Openavond leergangen. Mas ainda ta contento pasobra cu durante e tratamento di e ley di Citgo den Parlamento, a lansa preguntanan na e minister di Labor, specificamente colega Janssen-Varlack, tabata tin pregunta si por inclui hobennan di Scol Practico pa Ofishi, esta SPO, tambe den e preparacion y tambe den e aprendisahe pa loke ta e scol tecnico aki. Por a tuma nota den medionan di comunicacion cu minister di labor a anuncia cu e hobennan di SPO tambe lo wordo envolvi den e proceso di prepara hobennan pa labora den refineria Citgo, segun Kelly.